धनुषा । धनुषाको विदेह नगरपालिका–६ तीनकोरियाबाट हराएका १५ महिनाका बालक ११ दिनपछि सकुशल फेला परेका छन्। बालकलाई अपहरण गरेको आरोपमा प्रहरीले एक महिलालाई पक्राउ गरेको छ।

प्रहरीका अनुसार कमलेश महतोका छोरा सिधान्त महतो भदौ १८ गते अपराह्न करिब ४ः४० बजे घरको आँगनमा खेलिरहेका बेला अचानक हराएका थिए। बालक हराएपछि प्रहरी चौकी गिद्धाबाट टोली परिचालन गरी तत्काल खोजी सुरु गरिएको थियो।

बालकको खोजीका लागि जिल्ला प्रहरी कार्यालय धनुषाले प्रहरी उपरीक्षक रुपेश खड्काको कमान्डमा ६० जनाको टोली परिचालन गरेको थियो। तालिमप्राप्त कुकुर प्रयोग गरेर घटनास्थल तथा आसपासका क्षेत्रमा समेत खोजी गरिएको प्रहरीले जनाएको छ।

त्यसैगरी जिल्ला प्रहरी कार्यालयका डीएसपी ओमप्रकाश खनाल र मधेश प्रदेश प्रहरी कार्यालयबाट प्रहरी निरीक्षक बबिन्द्र नेम्बाङको नेतृत्वमा खटिएको प्रादेशिक सूचना विश्लेषण तथा अनुसन्धान टोलीले घटनाको प्राविधिक र सूचनामूलक अनुसन्धान अघि बढाएको थियो।

४१ वर्षीया महिलामाथि अपहरणको आरोप

अनुसन्धानका क्रममा बालकलाई कमला नगरपालिका–९ हथलेट्वाकी करिब ४१ वर्षीया पुनिता देवी पासवानले अपहरण गरेको खुलेको प्रहरीको भनाइ छ।

प्रहरीका अनुसार शंकित महिलाले बालकलाई ठाउँ–ठाउँमा सार्दै नेपाल तथा भारतका विभिन्न स्थानमा लुकाएर राख्ने गरेको प्रारम्भिक अनुसन्धानबाट खुलेको थियो।

बालकको खोजीलाई तीव्र पार्दै धनुषाका विभिन्न नाकामा चौबीसै घण्टा प्रहरी परिचालन गरिएको थियो। प्राविधिक अनुसन्धान र सम्भावित आवतजावतका स्थानमाथि निगरानी बढाइएको प्रहरीले जनाएको छ।

प्रहरीको घेराबन्दीपछि भदौ २९ गते दिउँसो करिब ३ः३५ बजे ती महिलाले बालकलाई उनको घरबाट करिब ३०० मिटर दक्षिण सडकछेउमा छाडेर भागेकी थिइन्।

प्रहरी टोलीले तत्काल बालकलाई नियन्त्रणमा लिएर स्वास्थ्य परीक्षण गराएको थियो। स्वास्थ्य अवस्था सामान्य रहेको बालकलाई त्यसपछि अभिभावकको जिम्मा लगाइएको प्रहरीले जनाएको छ।

बालकलाई छाडेर भागेकी पासवानलाई प्रहरीले सोही दिन साँझ भारततर्फ भाग्दै गरेको अवस्थामा विदेह नगरपालिका–१ महिनाथपुरस्थित दशगजा क्षेत्रबाट नियन्त्रणमा लिएको हो।

पक्राउ परेकी महिलाविरुद्ध अपहरण, शरीर बन्धक तथा मानव बेचबिखन तथा ओसारपसारसम्बन्धी कसुरमा अनुसन्धान अघि बढाइएको जिल्ला प्रहरी कार्यालय धनुषाले जनाएको छ।