काठमाडौं । राष्ट्रिय स्वतन्त्र पार्टीका सांसद मनिष खनालले नवलपुरमा श्रीमानबाटै श्रीमतीको हत्या भएको घटनालाई लिएर सरकारको ध्यानाकर्षण गराएका छन्।

मंगलबार बसेको प्रतिनिधिसभाको बैठकमा बोल्दै खनालले हरितालिका तीजको भोलिपल्ट विनयी त्रिवेणी गाउँपालिका–३ मा ४० वर्षीया उनीसरा विकको आफ्नै श्रीमानबाट हत्या भएको घटना सार्वजनिक भएको बताए।

घटनामा संलग्न आरोपितलाई प्रहरीले पक्राउ गरी अनुसन्धान अघि बढाएको जानकारी आफूले पाएको भन्दै उनले दोषीमाथि कडा कानुनी कारबाही गर्न माग गरे।

खनालले सोही पालिका र वडामा यसअघि पनि तीजकै आसपास श्रीमतीको हत्या भएको घटना भएको उल्लेख गर्दै एउटै प्रकृतिका घटना दोहोरिनुको कारण खोज्नुपर्ने बताए।

‘हत्याको शृङ्खला क्रमिक देखिएको छ भने मोडस अपरान्डी पनि उस्तै छ। यस्ता घटना किन बारम्बार दोहोरिरहेका छन् भनेर अध्ययन जरुरी छ,’ उनले भने।

उनका अनुसार विषय एउटा महिलाको हत्या र एउटा व्यक्तिलाई कारबाही गर्नेमा मात्र सीमित छैन। महिलाका लागि सुरक्षित समाज निर्माण गर्न राज्य र समाजले अहिलेसम्म गरेका प्रयास प्रभावकारी भए–नभएको समीक्षा गर्नुपर्ने आवश्यकता रहेको उनले बताए।

सांसद खनालले महिलामाथिको हिंसा रोक्न बालबालिकालाई सानै उमेरदेखि समानता र समानुभूतिको शिक्षा दिनुपर्नेमा जोड दिए।

सामाजिक सञ्जाल तथा सार्वजनिक बहसमा देखिने स्त्रीद्वेषी अभिव्यक्तिलाई सामान्य रूपमा लिने प्रवृत्तिले भविष्यमा अझ गम्भीर समस्या निम्त्याउन सक्ने उनले चेतावनी दिए।

‘एक बालक हुर्किएर पुरुष हुँदै गर्दा उसलाई समता र समानुभूतिको शिक्षामा जोड दिनु आवश्यक छ,’ खनालले भने, ‘सामाजिक सञ्जाल र सार्वजनिक छलफलमा आउने स्त्रीद्वेषी टिप्पणी तथा त्यसप्रतिको हाम्रो हलुका बुझाइले डरलाग्दो भविष्यको संकेत गरिरहेको छ।’

उनले महिलाले सुरक्षित महसुस गर्ने वातावरण बनाउन सरकार र समाज दुवैले तत्काल ठोस कदम चाल्नुपर्ने बताए।

‘हरेक तवरले महिलालाई सुरक्षित बन्ने वातावरण सिर्जना गर्न आवश्यक हरकदम अविलम्ब चाल्न सरकारको ध्यानाकर्षण गराउन चाहन्छु,’ उनले भने।

महिलाले भयमुक्त भएर आफ्नो जीवन बिताउन सक्ने अवस्था बनेपछि मात्रै तीजलगायतका पर्वको वास्तविक अर्थमा उत्सव मनाउन सकिने खनालको भनाइ थियो।