पूर्वी नवलपरासी । रसुवा बाढीमा परी बेपत्ता भएका पूर्वी नवलपरासीको मध्यविन्दु नगरपालिकाका १२ जनाको कुशको शव बनाएर सामूहिक अन्त्येष्टि गरिएको छ।

मध्यविन्दु नगरपालिकाका प्रमुख भीमलाल अधिकारीका अनुसार अमलटारीस्थित नारायणी नदी किनारमा उनीहरूको सामूहिक दाहसंस्कार गरिएको हो।

रसुवाको टिमुरेमा रहेको तेन्जिङ शेर्पा हाइड्रोपावरमा लामो समयदेखि कार्यरत उनीहरू भदौ १० गतेको बाढीमा परेर बेपत्ता भएका थिए।

मध्यविन्दु नगरपालिका वडा नम्बर १ सेतापानीका तीन जना र वडा नम्बर ५ बाघखोरका नौ जना बेपत्ता भएपछि गाउँ नै शोकमा डुबेको थियो।

जिल्ला प्रशासन कार्यालयका अनुसार बेपत्ता हुनेमा मध्यविन्दु–१ सेतापानीका हेमबहादुर चौधरी, हुसनबहादुर थारु र कालीराम महतो थारु छन्।

त्यस्तै मध्यविन्दु–५ बाघखोरका जीवन विक, गंगाराम मुखिया, विशाल मुखिया, सीताराम महतो, युद्ध महतो, एवदेव महतो, नुमनारायण महतो, केवलप्रसाद महतो र तेजबहादुर थारु रहेका छन्।

बाढीपछि उनीहरूको खोजी लगातार गरिएको थियो। लामो समयसम्म कुनै खबर नआएपछि परिवारले धार्मिक परम्पराअनुसार कुशको शव बनाएर अन्तिम संस्कार गरेका हुन्।

मध्यविन्दु नगरपालिकाले बेपत्ताको खोजीमा भएको खर्चसहित काजक्रियाका लागि प्रत्येक परिवारलाई एक लाख रुपैयाँ राहत दिने निर्णय गरेको नगरप्रमुख अधिकारीले जानकारी दिए।