काठमाडौं। दैलेखको महाबु गाउँपालिका-५ स्थित गोर्ती सामुदायिक वन तथा आसपासको जंगलबाट प्रहरीले ६ थान एकनाले भरुवा बन्दुक बरामद गरेको छ।

विशेष सूचनाका आधारमा जिल्ला प्रहरी कार्यालय दैलेखबाट प्रहरी हवल्दार पटकबहादुर शाहीको कमाण्डमा खटिएको टोलीले २०८३ असोज २ गते दिउँसो १२ बजे उक्त हतियार फेला पारेको हो।

प्रहरीका अनुसार गोर्ती सामुदायिक वनमा लुकाइछिपाइ राखिएको अवस्थामा ३ थान एकनाले भरुवा बन्दुक फेला परेको थियो। सोही स्थानबाट करिब ३ किलोमिटर टाढा आरनटोलको जंगलको झाडीमा बेवारिसे अवस्थामा थप ३ थान भरुवा बन्दुक बरामद गरिएको हो।

बरामद भएका सबै ६ थान भरुवा बन्दुक प्रहरीले नियन्त्रणमा लिएको छ। घटनामा संलग्न व्यक्तिहरूको खोजतलास गर्नुका साथै थप अनुसन्धान भइरहेको प्रहरीले जनाएको छ।