काठमाडौं । पूर्वराष्ट्रपति डा. रामवरण यादवले राजा-महाराजालाई ‘तानाशाह’ भनेपछि रास्वपा सांसद राजीव खत्री राजाको पक्षमा उत्रिएका छन् ।

खत्रीले यादवकै विगत सम्झाउँदै राजाको शासनकालमा जन्मिएर, हुर्किएर, पढेर राष्ट्रपति बनेका व्यक्तिले  राजालाई तानाशाह भन्न नमिल्ने तर्क गरेका छन् ।

‘पूर्वराष्ट्रपति महोदय ! तपाईं राजाको पालामा जन्मेको, हुर्केको, पढेको र जवानी बिताएको मान्छे हो । राजा तानाशाह थिए भने तपाईंको नामअगाडि डा. लेख्ने हैसियत हुँदैनथ्यो,’ खत्रीले भनेका छन् ।

यतिमात्र होइन, राजाले सत्ता नछाडेको भए यादव राष्ट्रपति बन्नै नसक्ने उनको दाबी छ ।

‘यदि राजाले सत्ता नछाडेको भए तपाईं राष्ट्रपति बन्नुहुन्नथ्यो,’ उनले भनेका छन् ।

खत्रीले आफू राजा वीरेन्द्र र ज्ञानेन्द्रको शासन भोगेको पुस्ताको भएको बताउँदै उनीहरूलाई ‘तानाशाह’ मान्न अस्वीकार गरेका छन् ।

‘उनीहरू तानाशाह थिएनन् । उनीहरू प्रजातान्त्रिक राजा थिए,’ उनको भनाइ छ ।

राजा महेन्द्रलाई समेत उनले विकासप्रेमी शासकका रूपमा प्रस्तुत गरेका छन् । इतिहासका सबै राजालाई एउटै डालोमा हालेर तानाशाह भन्न नमिल्ने उनको तर्क छ ।

‘राजा महेन्द्रभन्दा अघि इतिहासका कोही राजा तानाशाह थिए होलान्, तर सबै थिएनन् । तपाईंले सोचे जति पनि होइन,’ खत्रीले भनेका छन् ।

बरु गणतन्त्रमा समेत तानाशाही शैलीको शासन भोग्नुपरेको भन्दै खत्रीले पूर्वप्रधानमन्त्री केपी शर्मा ओलीमाथि समेत कटाक्ष गरेका छन् ।

‘बरु गणतन्त्रमा-त्यो पनि हिजो-अस्ति मात्र तानाशाह ओलीको राजकाज भोगेरै आएका हौँ,’ खत्रीले भनेका छन् ।

राजाको बचाउमा खरो उत्रिएका खत्रीले यसअघि संविधान र राजतन्त्रको सम्भावनाबारे पनि धारणा राखिसकेका थिए ।

करिब एक वर्षअघि उनले दुईतिहाइ बहुमत ल्याएर संविधान उल्ट्याउन सकिने भन्दै सडकमा तमासा नदेखाउन आग्रह गरेका थिए । अहिले भने संविधानको पक्षमा उभिने शक्तिहरू एक ठाउँमा आउनुपर्ने धारणा राखे ।

तर, संविधान संशोधनको विषयमा भने खत्रीले कुनै किसिमको डर देखाउन नहुने बताए ।

‘भो, अब संविधानको चिन्ताले कोही मरिच हुनुपर्दैन । यदि यो पुस्ता यो संविधानको पक्षमा हुँदैनथ्यो भने जेनजी आन्दोलनपछि दुई पेजको संविधानले देश चल्दै गरेको हुने थियो,’ उनले भनेका छन् ।

उनका अनुसार मुलुकको सार्वभौमसत्ता र भौगोलिक अखण्डताबाहेक अन्य विषयमा संविधान संशोधनको बाटो खुला छ । त्यसैले बदलिँदो समाज र राजनीतिक अपेक्षाअनुसार संविधानमा सुधार हुँदै जानुपर्ने उनको धारणा छ ।

खत्रीले जनताको चाहना भए राजतन्त्र र हिन्दू राज्य फर्काउनसमेत संविधान बाधक नरहेको बताएका छन् ।

‘जनताको चाहना हुन्छ भने राजतन्त्र र हिन्दू राज्य फर्काउनसमेत यो संविधान बाधक छैन,’ उनले भनेका छन् ।

उनले संविधानलाई राजनीतिक विरोध र समर्थनको हतियार बनाउन नहुनेसमेत बताएका छन् । ‘पछाडि फर्किने कुरा स्वीकार्य छैन’ भन्दै धम्क्याउने शैलीमा संविधानको बहस चलाउनुको सट्टा राजनीतिक यथार्थ र जनताको चाहनालाई समेट्नुपर्ने उनको भनाइ छ ।

यस्तो छ उनको स्टाटस:

दोस्रो: