काठमाडौं । शिक्षा तथा खेलकुदमन्त्री सस्मित पोखरेलले अखिल नेपाल फुटबल संघ (एन्फा) माथिको निलम्बन फुकुवाका लागि सरकारले उच्चस्तरमा पहल गरिरहेको बताएका छन्।

सोमबार प्रतिनिधिसभाको बैठकमा बोल्दै मन्त्री पोखरेलले अन्तर्राष्ट्रिय फुटबल महासंघ (फिफा) ले २४ जुन २०२६ मा एन्फालाई अर्को सूचना नभएसम्मका लागि निलम्बन गरेको जानकारी दिए।

मन्त्री पोखरेलका अनुसार राष्ट्रिय खेलकुद परिषद् (राखेप) ले दिएको निर्देशन पालना नगरी एन्फाले साधारणसभा तथा निर्वाचन प्रक्रिया अघि बढाएपछि पटक-पटक सचेत गराएको थियो।

निर्देशनको बेवास्ता गरेपछि राखेपले २०८२ चैत ११ गते राष्ट्रिय खेलकुद विकास ऐनको दफा २९ को उपदफा २ बमोजिम एन्फालाई निलम्बन गरेको उनले बताए।

एन्फाले दिएको निवेदनपछि भने २०८३ जेठ १ गते राखेपले उक्त निलम्बन फुकुवा गरेको मन्त्री पोखरेलले जानकारी दिए।

तर राखेपको निर्देशनलाई फिफाले ‘तेस्रो पक्षको हस्तक्षेप’ का रूपमा व्याख्या गरेको उनको भनाइ छ। यही विषयलाई आधार बनाएर फिफाले आफ्नो विधानअनुसार एन्फालाई अर्को सूचना नभएसम्म निलम्बन गरेको मन्त्री पोखरेलले बताए।

फिफाको निर्णयपछि एन्फाको निलम्बन फुकुवाका लागि सरकारले उच्चस्तरीय पहल गरिरहेको मन्त्री पोखरेलले संसद्मा जानकारी दिए।

उनले एन्फा विवाद समाधान गरी नेपाली फुटबलमाथि परेको असर हटाउन सरकार प्रयासरत रहेको बताए।

मन्त्री पोखरेलले नेपाल–चीन मैत्रीपूर्ण फुटबल खेलका क्रममा घाइते भएका आशिष राईको उपचारका लागि सरकारले आर्थिक सहयोग गर्ने निर्णय गरेको पनि जानकारी दिए।

थाइल्यान्डमा उपचाररत राईलाई राष्ट्रिय खेलकुद परिषद्को स्वीकृत बजेटको सीमाभित्र रहेर उपचार खर्च उपलब्ध गराउने निर्णय भएको उनले बताए।