काठमाडौं। त्रिपुरेश्वरमा चालक दावा लामाले गरेको आत्मदाह प्रयासपछि पूर्वमन्त्री सुमना श्रेष्ठले राज्य संयन्त्रको कार्यशैलीमाथि प्रश्न उठाएकी छन्।

उनले ट्राफिक नियम पालना गराउनु आवश्यक भए पनि कानुन कार्यान्वयन गर्दा नागरिकको सम्मान र मानवीय पक्षलाई बेवास्ता गर्न नहुने बताएकी छन्।

सामाजिक सञ्जालमार्फत प्रतिक्रिया दिँदै श्रेष्ठले घटनालाई ‘नागरिक सही कि प्रहरी सही’ भन्ने दुई कित्तामा मात्रै राखेर हेर्न नहुने बताइन्।

उनको प्रश्न छ, नागरिकले आफूलाई नसुनिएको, असहाय वा अन्यायमा परेको महसुस गर्ने अवस्था किन आउँछ ?

श्रेष्ठले नियम उल्लङ्घन भए कानुनी कारबाही हुनुपर्नेमा आफू स्पष्ट रहेको बताएकी छन्। तर कानुन कार्यान्वयन गर्ने क्रममा राज्यका प्रतिनिधिको व्यवहार पनि महत्वपूर्ण हुने उनको भनाइ छ।

‘ट्राफिक प्रहरी गलत छन् भन्नु पनि होइन। कानुन चाहिँदैन भन्नु त झन् होइन। जवाफदेहिता र मानवीयता सँगसँगै हुन सक्दैन र ?’ उनले प्रश्न गरेकी छन्।

यसअघि गणेश नेपालीको घटनामा पनि आफूले यस्तै विषय उठाएको श्रेष्ठले उल्लेख गरेकी छन्।

उनका अनुसार एउटा घटनामा को सही र को गलत भन्ने निष्कर्ष निकाल्नुअघि राज्य संयन्त्र कहाँ चुक्यो भन्ने प्रश्न पनि उठाउन आवश्यक हुन्छ।

श्रेष्ठले नागरिकले आफू अन्यायमा परेको महसुस गरेपछि सामाजिक सञ्जालमै पुगेर आक्रोश पोख्नुपर्ने अवस्था आउन नदिन प्रभावकारी गुनासो सुनुवाइ प्रणाली आवश्यक रहेको बताएकी छन्।

उनले घटनालाई सामाजिक सञ्जालमा केवल विवाद वा ‘कन्टेन्ट’ बनाउने प्रवृत्तिप्रति पनि चिन्ता व्यक्त गरेकी छन्।

नागरिकले आफ्नो कुरा सुनिदिने निकाय छ भन्ने विश्वास गर्न सक्ने अवस्था राज्यले बनाउनुपर्ने उनको भनाइ छ।

‘नियम, कारबाही र जवाफदेहितासँगै मानवीयता, सम्मान र सुन्ने प्रणाली पनि आवश्यक छ,’ श्रेष्ठले भनेकी छन्।

त्रिपुरेश्वर घटनामा चालक दावा लामाको ट्राफिक प्रहरीसँग विवाद भएको सार्वजनिक विवरणमा उल्लेख छ।

तर घटनाको वास्तविक कारण र विवादको क्रमबारे विभिन्न दाबी सार्वजनिक भएका छन्। सम्बन्धित निकायबाट घटनाको तथ्य छानबिन भइरहेको छ।

त्यसैले घटनालाई लिएर निष्कर्षमा पुग्नुअघि छानबिनको परिणाम कुर्नुपर्ने देखिन्छ।