काठमाडौं । नेकपा एमालेका नेता तथा राष्ट्रिय सभा सदस्य सोम पोर्तेलले पार्टीका केन्द्रीय नेताहरूलाई आन्तरिक मतभेद र बहस सामाजिक सञ्जाल तथा सञ्चारमाध्यममा सार्वजनिक नगर्न आग्रह गरेका छन्।

पोर्तेलले मंगलबार सामाजिक सञ्जाल फेसबुकमार्फत एमालेका केन्द्रीय नेताहरूलाई सम्बोधन गर्दै पार्टीभित्रका विषय पार्टीकै बैठक, विधि र प्रक्रियाबाट टुंग्याउनुपर्ने बताएका हुन्।

उनले पछिल्लो समय एमालेका नेताहरूका अभिव्यक्ति सामाजिक सञ्जाल र सञ्चारमाध्यममा निरन्तर आइरहेको उल्लेख गर्दै मिडियामा हेडलाइन बन्ने वा सामाजिक सञ्जालमा लाइक, कमेन्ट र वाहवाही पाउँदैमा राजनीतिक लोकप्रियता र उचाइ नबढ्ने टिप्पणी गरेका छन्।

उनले लेखेका छन्, ‘मिडियामा हेडलाइन बन्दैमा वा सामाजिक सञ्जालमा प्राप्त लाइक, कमेन्ट र वाहवाहीले राजनीतिक लोकप्रियता र उचाइ बढ्छ भन्ने भ्रममा तपाईंहरू हुनुहुन्छ भन्ने मलाई विश्वास छैन।’

पोर्तेलले पार्टीको केन्द्रीय कमिटी बैठक जारी रहेको अवस्थामा नेताहरूले आफ्ना असहमति र विचार बैठकमै स्पष्ट रूपमा राख्नुपर्ने सुझाव दिएका छन्। आफ्ना धारणा तथ्यसहित प्रस्तुत गरेर केन्द्रीय सदस्यहरूलाई विश्वस्त र सहमत गराउन तथा आवश्यक निर्णय गराउने प्रयास गर्न उनले आग्रह गरेका छन्।

निर्णय तत्काल आफ्नो पक्षमा नआए पनि लोकतान्त्रिक विधि र पार्टी प्रक्रियाभित्र रहेर निरन्तर प्रयास गर्नुपर्ने उनको भनाइ छ।

उनले पार्टीको आन्तरिक बहस, असहमति र विचारलाई सडक तथा सामाजिक सञ्जालमा छताछुल्ल पार्ने प्रवृत्तिले पार्टीलाई बलियो नबनाउने बताएका छन्।

‘पार्टीभित्रका विषय पार्टीकै बैठक, विधि र प्रक्रियाबाट टुङ्ग्याउने राजनीतिक संस्कारलाई अझ बलियो बनाउन आवश्यक छ,’ पोर्तेलले भनेका छन्, ‘यो हाम्रो पार्टी जीवनको अनुशासनभित्र पर्ने गम्भीर मूल्यमान्यता समेत हो।’

पोर्तेलले पार्टी निर्माणमा नेताहरूको योगदान स्वीकार गर्दै लाखौँ कार्यकर्ताको योगदानलाई पनि कम नआँक्न आग्रह गरेका छन्। नेताहरूको योगदानको मात्रा तलमाथि हुन सक्ने भए पनि आफूहरूजस्ता कार्यकर्ताले समेत श्रम, समय, संघर्ष र विश्वासबाट पार्टी निर्माण गरेको उनको भनाइ छ।

उनले नेताहरूबीचको बहस र मतभिन्नता व्यक्तिगत प्रतिष्ठा वा सामाजिक सञ्जालको लोकप्रियताको विषय नभएको बताएका छन्।

‘यो पार्टीको भविष्य, संगठनको एकता र लाखौँ कार्यकर्ताको भावनासँग जोडिएको विषय हो,’ उनले भनेका छन्, ‘यसमा गम्भीर सचेतनासहित प्रस्तुत हुन, सोच्न र निर्णयमा पुग्न सुझाव दिन चाहन्छु।’