काठमाडौं । डोल्पाको जुफाल विमानस्थलमा सीता एयरको जहाज अवतरणका क्रममा दुर्घटनामा परेको छ।

बिहीबार बिहान नेपालगञ्जबाट डोल्पा आएको जहाज अवतरण गर्ने क्रममा पछाडितर्फको दायाँ पाङ्ग्रा खुस्किएपछि दुर्घटना भएको हो।

डोल्पाका सहायक प्रमुख जिल्ला अधिकारी रामदत्त चौलागाईका अनुसार बिहान ८ः२५ बजे अवतरण गर्ने क्रममा जहाजको एउटा पाङ्ग्रा खुस्किएको थियो।

‘अवतरणका क्रममा पछाडितिरको दायाँतर्फको एउटा पाङ्ग्रा खुस्किएको हो। जहाजमा सामान्य क्षति भएको छ। सबै यात्रु सकुशल छन्,’ उनले भने।

जहाजमा १३ जना यात्रु सवार थिए। तीमध्ये ११ जना पुरुष र ७ जना विदेशी नागरिक रहेको चौलागाईले जानकारी दिए।

दुर्घटनापछि जहाजको प्राविधिक परीक्षण भइरहेको छ। प्राविधिक टोलीले जहाजको अवस्था जाँच गरिरहेको प्रशासनले जनाएको छ।