धादिङ। रसुवाको भोटेकोशी हुँदै त्रिशूली नदीमा आएको बाढीबाट प्रभावित धादिङको गल्छी गाउँपालिका–६ बैरेनीस्थित बागेश्वरी माध्यमिक विद्यालयमा पुनः पठनपाठन सुरु भएको छ। तर, नदी किनारको असुरक्षित भवनमा पढाइ भइरहेकाले केही अभिभावक अझै आफ्ना बालबालिकालाई विद्यालय पठाउन डराइरहेका छन्।

अहिले उनीहरू फेरि कक्षाकोठामा फर्किएका छन्। कक्षाकोठा पर्याप्त नभएपछि विद्यालयले बिहान र दिउँसो गरी दुई सिफ्टमा पढाइ सञ्चालन गरिरहेको छ।

विद्यालयका माध्यमिक तह इन्चार्ज तथा सूचना अधिकारी प्रकाश मल्लका अनुसार महेश दोभाननजिक निर्माणाधीन १५ कोठे भवनबाट तत्कालका लागि कक्षा सञ्चालन गरिएको हो।

पठनपाठनसँगै विद्यार्थीलाई बाढीपछि देखिएको मानसिक तनावबाट बाहिर ल्याउन मनोसामाजिक परामर्शसमेत दिइएको छ। गल्छी गाउँपालिकाको स्वास्थ्य शाखा र विभिन्न संस्थाको सहयोगमा परामर्श कक्षा सञ्चालन गरिएको मल्लले बताए।

बाढीले विद्यालयका चारवटा भवनमा क्षति पुर्‍याएको थियो। तल्लो तलाका १७ वटा कोठामा रहेका कम्प्युटर ल्याब, ईसीडी कक्षा र पुस्तकालयमा समेत क्षति पुगेको विद्यालयले जनाएको छ।

बाढी आउनुअघि सूचना पाएपछि विद्यार्थीलाई समयमै विद्यालयबाट निकालेर माथिल्लो डाँडातर्फ लगिएको मल्लले बताए। त्यसैले ठूलो मानवीय क्षति हुनबाट जोगिएको उनको भनाइ छ।

विद्यालय पुनः सञ्चालनमा ल्याउन करिब पाँच हजार स्वयंसेवक परिचालन भएको मल्लले बताए। विभिन्न राजनीतिक दलका विद्यार्थी तथा युवा संगठन, स्थानीयवासी र राष्ट्रिय तथा अन्तर्राष्ट्रिय संघसंस्थाले सरसफाइदेखि भौतिक संरचना व्यवस्थापनसम्म सहयोग गरेका छन्।

कक्षाकोठामा आवश्यक फर्निचर, विद्युत् र खानेपानीको व्यवस्था पनि सहयोगमार्फत जुटाइएको छ।

‘सरसफाइ भइसकेको छ। फर्निचर जुटाउने क्रममै छौँ। अहिले ६० जोडी डेस्क–बेञ्च छ। १ सय ४० जोडी भएपछि पुरानै भवनमा सर्छौं,’ मल्लले भने।

भवनमा रंगरोगनको कामसमेत भइरहेको छ। दसैँअघि सबै कक्षा पुरानो भवनमा सार्न भने सम्भव नहुने उनले बताए।

विद्यालयमा पढाइ सुरु भए पनि सबै विद्यार्थी नियमित भएका छैनन्। विशेषगरी ईसीडीका बालबालिकाका अभिभावक नदी किनारको भवनमा पढाइ भइरहेकाले जोखिम हुने भन्दै आफ्ना छोराछोरी विद्यालय पठाउन हिचकिचाइरहेका छन्।

विद्यालयले अभिभावकलाई फोनमार्फत परामर्श दिइरहेको छ। बालबालिकालाई पुनः विद्यालय फर्काउने प्रयास भइरहेको मल्लले बताए।

बागेश्वरी माध्यमिक विद्यालयमा ४ सय १६ विद्यार्थी अध्ययनरत छन्। बाढीपछि क्षतिग्रस्त विद्यालयमा पढाइ त सुरु भएको छ, तर सुरक्षित भवनमा सबै कक्षा सार्ने चुनौती भने अझै कायमै छ।