विराटनगर । ताप्लेजुङको दोभान बजारमा भीषण आगलागी भएको छ। स्थानीय दाबा शेर्पाको घरबाट सुरु भएको आगो बस्तीका अन्य घरमा समेत फैलिएको प्रहरीले जनाएको छ।

प्रहरीका अनुसार आगलागीबाट अहिलेसम्म पाँचभन्दा बढी घरमा आगो सल्किएको छ। झुरुप्प बस्ती भएका कारण आगो नियन्त्रणमा लिन कठिनाइ भइरहेको छ।

आगो नियन्त्रणका लागि फुङलिङ बजारबाट दुईवटा दमकल घटनास्थलतर्फ पठाइएको छ। दमकल पुग्नुअघि नै स्थानीयले आगो नियन्त्रणको प्रयास गरिरहेका छन्।

आगो फैलिन थालेपछि आसपासका केही घर भत्काएर आगोको फैलावट रोक्ने प्रयाससमेत भइरहेको प्रहरीले जनाएको छ।

जिल्ला प्रहरी कार्यालय ताप्लेजुङका प्रमुख डीएसपी कमल बजागाईंले घरहरू नजिक–नजिक रहेकाले आगो नियन्त्रणमा लिन चुनौती भइरहेको बताए।

दोभान बजारमा यसअघि पनि आगलागी भएको थियो। विगतको घटनाका कारण पनि स्थानीयमा त्रास बढेको छ।

आगलागीबाट भएको मानवीय तथा भौतिक क्षतिको पूर्ण विवरण भने आउन बाँकी छ। आगो नियन्त्रणमा आएपछि क्षतिको विवरण संकलन गरिने प्रहरीले जनाएको छ।