काठमाडौं । बंगालको खाडीबाट विकसित न्यूनचापीय प्रणाली कमजोर बन्दै गएपछि पूर्वी नेपालमा मौसम सुधार हुन थालेको छ। तर पश्चिम नेपालमा भने भारीदेखि अति भारी वर्षाको जोखिम अझै कायमै छ।

पछिल्लो एक घण्टामा देशका अधिकांश भागमा वर्षा रोकिएको छ। लुम्बिनी र सुदूरपश्चिमका केही स्थानमा भने हल्का वर्षा भइरहेको मौसम पूर्वानुमान महाशाखाले जनाएको छ।

पछिल्लो २४ घण्टामा गण्डकी, लुम्बिनी, कर्णाली र सुदूरपश्चिमको तराई क्षेत्रमा भारी तथा धेरै भारी वर्षा भएको थियो। सबैभन्दा धेरै पाल्पाको अर्चले वर्षा मापन केन्द्रमा १९६ मिलिमिटर पानी परेको छ।

मौसमविद् रोजन लामिछानेका अनुसार बागमतीदेखि पूर्वका कोशी र मधेशका तराई क्षेत्रमा पछिल्लो एक घण्टामा वर्षा भएको छैन। कतै घाम लागेको छ भने कतै बादल लागेको अवस्था छ।

शनिबार गण्डकी, लुम्बिनी, कर्णाली र सुदूरपश्चिमका धेरै स्थानमा हल्कादेखि मध्यम वर्षा हुने सम्भावना छ। केही स्थानमा भारी वर्षासमेत हुन सक्ने महाशाखाले जनाएको छ।

शनिबार राति बागमती, गण्डकी, लुम्बिनी, कर्णाली र सुदूरपश्चिमका केही स्थानमा भारीदेखि धेरै भारी वर्षाको सम्भावना छ। मधेशका एक–दुई स्थानमा पनि भारी वर्षा हुन सक्नेछ।

लुम्बिनी र सुदूरपश्चिमका एक–दुई स्थानमा अति भारी वर्षाको समेत सम्भावना रहेको छ। कोशी, बागमती, गण्डकी र लुम्बिनीका तराई तथा बागमती, गण्डकी, लुम्बिनी र कर्णालीका पहाडी क्षेत्रमा हावाहुरी चल्न सक्ने पूर्वानुमान छ।

मौसमविद् लामिछानेका अनुसार पूर्वी क्षेत्रमा वर्षा हटेर मौसम सुधारको क्रममा छ। पश्चिममा भने अझै सावधानी आवश्यक छ।

भारी वर्षाका कारण बाढी, पहिरो, खोलानालामा पानीको बहाव बढ्ने र कटानको जोखिम हुन सक्ने भएकाले जोखिमयुक्त क्षेत्रका बासिन्दालाई सतर्क रहन आग्रह गरिएको छ।

आइतबारदेखि सुदूरपश्चिममा वर्षा केही घट्ने र सोमबारदेखि देशैभर मौसम सुधार हुने महाशाखाको अनुमान छ।

हाल देशमा मनसुनी वायुका साथै पश्चिमी वायुको समेत आंशिक प्रभाव छ। बंगालको खाडीबाट विकसित न्यूनचापीय प्रणाली पनि यही मौसमी प्रणालीमा मिसिएको छ।

भारतीय मौसम विभागका अनुसार अहिले उक्त प्रणाली उत्तर छत्तीसगढ र आसपासको उत्तरपूर्वी मध्यप्रदेशमा केन्द्रित छ।

उत्तरी अन्डमान सागरमा न्यूनचापीय क्षेत्र बनेर बंगालको खाडी हुँदै विकसित भएको यो प्रणाली डिप्रेसन हुँदै गहिरो न्यूनचापीय प्रणाली बनेको थियो।

बुधबार राति उत्तर आन्ध्र प्रदेशको तट पार गरेर दक्षिण ओडिशातर्फ प्रवेश गरेको प्रणाली उत्तरपश्चिमतर्फ सर्दै नेपालतर्फ आएको थियो।

यसै प्रणालीको प्रभावले बुधबार रातिदेखि नेपालका अधिकांश भूभागमा लगातार वर्षा भएको थियो।