बागलुङ। लगातारको भारी वर्षापछि कालीगण्डकी नदीमा पानीको बहाव तीव्र रूपमा बढेको छ। पर्वतको मोदीवेणीमा नदीको सतह चेतावनी तहभन्दा माथि पुगेपछि आसपासका बस्तीमा सतर्कता बढाइएको छ।

जिल्ला प्रशासन कार्यालय बागलुङ, पर्वत र म्याग्दीले नदी तटीय क्षेत्रका बासिन्दालाई उच्च सतर्कता अपनाउन आग्रह गरेका छन्।

मुस्ताङतर्फबाट लेदोसहितको बाढी कालीगण्डकीमा मिसिएपछि बहाव थप बढेको प्रहरीले जनाएको छ। नदी किनार तथा जोखिमयुक्त क्षेत्रमा नजान र सम्भावित जोखिमबाट जोगिन सुरक्षित स्थानमा बस्न सर्वसाधारणलाई आग्रह गरिएको छ।

म्याग्दीको बेनी, बागलुङको नियरघाट, मालढुङ्गालगायत कालीगण्डकी आसपासका क्षेत्रमा विशेष सावधानी अपनाउन प्रशासनले भनेको छ।

शनिबार बिहानदेखि नदीको पानीको सतह अघिल्लो दिनको तुलनामा थप बढेको छ।

पर्वतको मोदीवेणीमा भने कालीगण्डकीले चेतावनी तह पार गरेको छ। बाढी पूर्वानुमान महाशाखाका अनुसार त्यहाँ ७ मिटर चेतावनी तह रहेकामा पानीको सतह ७.७५ मिटर पुगेको छ।

हाल पानीको सतह केही घट्ने क्रममा रहे पनि जोखिम कायमै रहेकाले सतर्कता नछाड्न महाशाखाले आग्रह गरेको छ।

कालीगण्डकी बग्ने अन्य स्थानमा पानीको सतह चेतावनी तहभन्दा तलै छ। तर नदीको बहाव भने बढ्दो क्रममा रहेकाले तटीय क्षेत्रमा बसोबास गर्नेहरूलाई सावधानी अपनाउन भनिएको छ।