चितवन। लगातारको वर्षासँगै त्रिशूली नदीमा आएको तीव्र बहावले चितवनको इच्छाकामना गाउँपालिका–४ स्थित मनकामना केबलकारको गेटभित्रको सडक भासिएको छ।

गोरखाको सहिद लखन गाउँपालिका–३ सिलिङटार जोड्ने झोलुङ्गे पुलमा नदीको बहावले निरन्तर प्रहार गरेपछि केबलकारको गेटदेखि भित्रतर्फको सडक भासिएको हो।

इच्छाकामना–४ का वडाध्यक्ष रुद्र उप्रेतीका अनुसार वर्षासँगै नदीले धार परिवर्तन गरेको छ। नदीको तीव्र बहावले झोलुङ्गे पुलमा लगातार दबाब पर्दा मुख्य राजमार्गमा समेत चिरा परेको र भित्री सडक भासिएको उनले बताए।

सडक भासिएपछि मनकामना केबलकार सेवा बन्द गरिएको छ। नदीको बहाव अझै तीव्र रहेकाले पुल र आसपासका क्षेत्रमा थप क्षति हुन सक्ने जोखिम रहेको वडाध्यक्ष उप्रेतीले बताएका छन्।