हेटौंडा। लगातारको वर्षासँगै आएको बाढीपहिरोले काठमाडौं जोड्ने प्रमुख राजमार्गहरू अवरुद्ध भएपछि हेटौंडामा सवारीसाधनको चाप बढेको छ।

पृथ्वी राजमार्ग र नारायणगढ–मुग्लिङ सडकका विभिन्न स्थानमा अवरोध भएपछि काठमाडौं जाने मालवाहक ट्रक तथा यात्रुवाहक बसहरू वैकल्पिक मार्गतर्फ मोडिएका छन्।

तर हेटौंडाबाट काठमाडौं जोड्ने कान्ति लोकपथ, फाखेल र सिस्नेरी सडकखण्डमा समेत ठाउँठाउँमा अवरोध भएपछि अहिले त्रिभुवन राजपथमा सवारीको चाप बढेको हो।

सडकको अवस्था र सुरक्षालाई ध्यानमा राख्दै प्रशासनले सवारी सञ्चालनको समय तथा भारसम्बन्धी सीमा तोकेको छ। त्यसका कारण हेटौंडा क्षेत्रमा काठमाडौं जाने मालवाहक तथा यात्रुवाहक सवारीको लामो लाइन देखिएको छ।

मुख्य सडकमा अवरोध हुँदा वैकल्पिक मार्गमा समेत सवारीको चाप बढेपछि हेटौंडाबाट काठमाडौं जाने यात्रु तथा चालकहरूलाई थप समय लाग्ने अवस्था बनेको छ।