काठमाडौं । काठमाडौंको मुटुमा रहेको टुँडिखेल अब फेरि हरियो देखिने भएको छ। नागरिकका लागि खुला र हरियाली क्षेत्र बनाउने उद्देश्यले भइरहेको सौन्दर्यीकरणको काम अन्तिम चरणमा पुगेको छ।

काठमाडौं महानगरपालिकाले सैनिक मञ्चको दक्षिणतर्फको मैदानमा विशेष प्रजातिको बरमुढा दुबो रोप्न थालेको छ। दुबो फैलिएपछि सुख्खा मौसममा उड्ने धुलो र पानी पर्दा हुने हिलोको समस्या घट्ने अपेक्षा गरिएको छ।

टुँडिखेलको सौन्दर्यीकरणको जिम्मा बेन्जामीन–सुस्मन–आरके जेभीले पाएको हो। आरके जेभीका सञ्चालक रविनकुमार गौतमका अनुसार करसहित २ करोड ४२ लाख रुपैयाँमा ठेक्का सम्झौता भएको काम करिब ९० प्रतिशत सकिएको छ।

अहिले ५० भन्दा बढी श्रमिक मैदानमा खटिएका छन्। दुबो रोप्नेदेखि मैदान व्यवस्थापन र आवश्यक पूर्वाधार निर्माणसम्मका काम धमाधम भइरहेका छन्।

दुबो सुक्न नदिन मैदानका चार स्थानमा बोरिङको व्यवस्था गरिएको छ। करिब ६१ हजार २ सय ६३ वर्गमिटर क्षेत्रफलमा फैलिएको टुँडिखेललाई व्यवस्थित हरियाली खुला क्षेत्रका रूपमा विकास गर्ने महानगरको योजना छ।

काम सकिएपछि टुँडिखेलमा बिहान–बेलुका हिँडडुल गर्ने, व्यायाम गर्ने र खुला वातावरणमा बस्ने सर्वसाधारणलाई थप सहज हुने अपेक्षा गरिएको छ। ऐतिहासिक टुँडिखेल लामो समयदेखि काठमाडौंको महत्वपूर्ण खुला सार्वजनिक स्थलका रूपमा रहँदै आएको छ।