काठमाडौं । त्रिभुवन विश्वविद्यालयको सिनेट बैठक असोज २२ गते बस्ने भएको छ। नीति तथा कार्यक्रम र वार्षिक बजेट पारित गर्ने तयारीसहित बैठक बोलाइएको त्रिविका प्रवक्ता नवीन्द्र भण्डारीले जानकारी दिएका छन्।

त्रिविको सभा बैठक २०८३ असारभित्रै बस्नुपर्ने भए पनि अहिलेसम्म हुन सकेको थिएन। बैठक नबस्दा नीति तथा कार्यक्रम र वार्षिक बजेट पारित हुन नसकेको त्रिवि केन्द्रीय क्याम्पसका स्ववियु सभापति दीपकराज जोशीले बताए।

तर, असोज २२ गते बैठक तोकिए पनि सदस्यहरूलाई अहिलेसम्म औपचारिक सूचना, कार्यसूची र प्रस्ताव उपलब्ध नगराइएको भन्दै जोशीले प्रक्रियामाथि प्रश्न उठाएका छन्।

त्रिविको संगठन तथा शैक्षिक प्रशासनसम्बन्धी नियम, २०५० को परिच्छेद १७ मा सभा बैठक बस्नुभन्दा कम्तीमा १५ दिनअघि सदस्यहरूलाई सूचना, कार्यसूची र प्रस्ताव उपलब्ध गराउनुपर्ने व्यवस्था रहेको उनको भनाइ छ।

जोशीले विश्वविद्यालयको ग्रेस लिस्ट हजारौँ विद्यार्थीको वर्षौँको अध्ययन र मेहनतसँग जोडिएको विषय भएको उल्लेख गर्दै नीति तथा कार्यक्रम र बजेटजस्ता महत्त्वपूर्ण विषय पनि नियमित प्रक्रियाबाटै अघि बढाउनुपर्ने बताए। नियमित प्रक्रिया पूरा नगरी सभा बैठक बोलाउने वा महत्त्वपूर्ण विषय अघि बढाउने प्रयासले विश्वविद्यालयको प्राज्ञिक मर्यादामाथि प्रश्न उठ्ने दाबी गरेका छन्।

साथै, उनले विश्वविद्यालयको प्राज्ञिक मर्यादामाथि प्रश्न उठ्ने दाबी गरेका छन्।