पोखरा । पोखराको फिर्केखोला किनारमा बनेका संरचना हटाउने अभियान फेरि सुरु भएको छ। पोखरा महानगरपालिकाले बिहीबारदेखि खोलाको बहाव क्षेत्रमा रहेका बाँकी संरचनामाथि डोजर चलाउन थालेको हो।

महानगरका अनुसार खोलाको क्षेत्रभित्र पर्ने ५६ वटा पक्की तथा संस्थागत संरचना अझै हटाउन बाँकी छन्। पटकपटक पत्राचार गर्दा पनि संरचना नहटाएपछि डोजर चलाइएको नगर प्रहरी निरीक्षक पुरुषोत्तम थापाले बताए।

२०८० सालको नापजाँचमा फिर्केखोलाको बहाव क्षेत्रभित्र १६० संरचना पहिचान भएका थिए। तीमध्ये १०४ वटा अस्थायी तथा केही पक्की संरचना यसअघि नै हटाइसकिएको छ। बाँकीमा सरकारी कार्यालय, सामुदायिक भवन र ठूला पक्की संरचनासमेत छन्।

कानुनी प्रक्रिया, पुनः नापजाँच र वर्षाका कारण अभियान केही समय रोकिएको महानगरले जनाएको छ। यसअघि जेठ १० गतेदेखि तीन स्थानबाट एकैपटक डोजर चलाएर संरचना हटाउन थालिएको थियो।

महानगरको पर्यटन तथा सहरी विकास महाशाखाका प्रमुख विमल रञ्जन कार्कीका अनुसार चालु आर्थिक वर्षभित्र फिर्केखोलाको बहाव क्षेत्र पूर्ण रूपमा खाली गराउने लक्ष्य छ। संरचना हटाएपछि खोलाको संरक्षण र सौन्दर्यीकरणको काम अघि बढाइनेछ।

यसअघि संरचना भत्काइएका कतिपय घरमा भने अझै मानिसले बसोबास गरिरहेका छन्।