काठमाडौं । श्रम तथा व्यवसायजन्य सुरक्षा विभागले नेपालका सबै रोजगारदाता तथा प्रतिष्ठानलाई आफ्ना श्रमिकलाई कानुनअनुसार चाडपर्व खर्च उपलब्ध गराउन निर्देशन दिएको छ। विभागले श्रमिकको हकका रूपमा रहेको उक्त सुविधा उपलब्ध गराउन रोजगारदाताहरूलाई आग्रह गरेको हो।

श्रम ऐन, २०७४ को दफा ३७ अनुसार प्रत्येक श्रमिकले आफूले खाइपाइ आएको एक महिनाको आधारभूत पारिश्रमिक बराबरको रकम चाडपर्व खर्चका रूपमा प्राप्त गर्ने व्यवस्था रहेको छ। यसअनुसार रोजगारदाताले कानुनले तोकेको सुविधा श्रमिकलाई उपलब्ध गराउनुपर्ने हुन्छ।

चाडपर्वका बेला श्रमिकलाई थप आर्थिक सहयोग पुगोस् भन्ने उद्देश्यले प्रदान गरिने यो रकम श्रमिकको आधारभूत पारिश्रमिकसँग सम्बन्धित हुन्छ। त्यसैले चाडपर्व खर्च निर्धारण गर्दा श्रमिकले पाउँदै आएको आधारभूत पारिश्रमिकलाई आधार मानिन्छ।

विभागका अनुसार रोजगारदाता वा प्रतिष्ठानले कानुनबमोजिम चाडपर्व खर्च उपलब्ध नगराएमा सम्बन्धित श्रमिकले आफ्नो अधिकारका लागि सम्बन्धित निकायमा उजुरी गर्न सक्नेछन्। त्यसका लागि श्रमिकले आफू कार्यरत क्षेत्रको श्रम तथा रोजगार कार्यालय वा श्रम तथा व्यवसायजन्य सुरक्षा विभाग मा सम्पर्क गरी आवश्यक प्रक्रिया अघि बढाउन सक्ने व्यवस्था रहेको छ।