काठमाडौं । अमेरिकी राष्ट्रपति डोनाल्ड ट्रम्पले आगामी महिना चीनमा रुसी राष्ट्रपति भ्लादिमिर पुटिन र चिनियाँ राष्ट्रपति सी जिनपिङसँग भेटवार्ता गर्न तयार रहेको बताएका छन्। सम्भावित त्रिपक्षीय बैठकमा आणविक निशस्त्रीकरण र युक्रेन युद्धबारे छलफल हुन सक्ने उनको सङ्केत छ।

ट्रम्पले युक्रेनी राष्ट्रपति भोलोदिमिर जेलेन्स्कीको आलोचना गर्दै युक्रेनको तर्फबाट अरू कसैले वार्ता गर्नुपर्ने समय आएको टिप्पणी गरेका छन्। उनको यस अभिव्यक्तिले युक्रेन युद्ध अन्त्य गर्ने विषयमा वासिङ्टन र किएभबीच देखिएको मतभेदलाई थप सतहमा ल्याएको छ।

त्यस्तै, क्रेमलिनका प्रवक्ता दिमित्री पेस्कोभले चीनमा हुने एसिया-प्रशान्त आर्थिक सहयोग (एपेक) शिखर सम्मेलनका क्रममा तीन देशका राष्ट्रपतिबीच भेटवार्ताको सम्भावनाबारे चर्चा भए पनि त्यसबारे कुनै ठोस सहमति नभएको बताएका छन्। नोभेम्बर १८ र १९ मा सेन्जेनमा हुने सम्मेलनमा तीनै देश सहभागी हुँदैछन्। यद्यपि, चिनियाँ विदेश मन्त्रालयले भने सम्भावित त्रिपक्षीय भेटबारे आफूलाई जानकारी नभएको जनाएको छ।

युक्रेनले भने आफ्नो सहभागिताबिना हुने कुनै पनि बैठकले रुसलाई युद्ध जारी राख्न प्रोत्साहन गर्न सक्ने चेतावनी दिएको छ। युक्रेनी विदेशमन्त्री एन्ड्री सिबिहाले किएभको सहभागिताबिना हुने वार्ताप्रति चिन्ता व्यक्त गरेका छन्। रुसी प्रवक्ता पेस्कोभले पनि अन्तिम शान्ति सम्झौतामा पुग्न युक्रेनी प्रतिनिधिको सहभागिता आवश्यक रहेको बताएका छन्।

यसैबीच, रुसले युक्रेनमाथि आक्रमण तीव्र बनाएको छ। सोमबार खार्किभ क्षेत्रमा रुसी ड्रोनबाट भएको आक्रमणमा बालबालिकासहित छ जनाको मृत्यु भएको अधिकारीहरूले बताएका छन्।

साथै, युद्ध जारी रहेका बेला युक्रेनले अमेरिकामाथि महत्त्वपूर्ण गुप्तचर सूचना उपलब्ध नगराएको आरोपसमेत लगाएको छ।