काठमाडौं । नेकपा एमालेका सचिव योगेश भट्टराईले सुशासन र रूपान्तरणका कदममा जेनजीको माग सम्बोधन गर्न नसकेकोमा माफी मागेका छन् । उनले आज (शनिबार) सामाजिक सञ्जालमा भिडियो सन्देश जारी गर्दै भट्टराईले एमाले चुकेको भन्दै माफी मागेका हुन् ।

‘भ्रष्टाचार देशको मुख्य बेथिति हो । भ्रष्टाचार सुशासनको पक्षमा राज्य संयन्त्रलाई जति रूपान्तरण गर्नुपथ्र्यो त्यसमा चुक्यौं । युवा, जनताको माग सम्बोधन गर्न चुकेका छौं,’ भट्टराईले भने, ‘जनताको अगाडि माफी पनि माग्न चाहन्छौं । जनता विना पार्टी टिक्दैनन् । एमाले युवाले बनाएको पार्टी हो । युवाले नेतृत्वलाई निरन्तर दिएर हामी अगाडि बढ्नु पर्छ ।’

अब एमालेको कार्यशैली फेरिने पनि उनले प्रष्ट पारेका छन् । ‘एमाले अब हिजो जस्तो हुँदैन । युवामैत्री, प्रगगितशील र गतिशील हुनेछ । संरचनागत सुधार हामी गर्छौं । हामीलाई विश्वास गर्नुस् । हाम्रो आफैमाथि पनि भ्रष्टाचार बेथितिको निष्पक्ष छानबिन र न्यायिक प्रक्रियाको निम्ति एमाले तयार छौं’, भट्टराईले भने, ‘जेनजी पुस्ता हामीसँग किन आइरहेको छैन ? यतिबेला पार्टी पुनर्गठन हाम्रो महत्वपूर्ण जिम्मेवारी हुनेछ । अब नेतृत्व, संगठन र कार्यशैली पुनर्गठन गर्नैपर्छ ।’ पार्टीभित्र टुटेको मनलाई जोड्ने र सबैको अस्तित्वलाई स्वीकारेर जानुपर्ने उनको भनाइ छ ।

‘पार्टी सञ्चालनमा गल्ती कमजोरी भएको छ । मन टुटेका छन् । सबैको अस्तित्वलाई स्वीकारेर पार्टी पुनर्गठन हुनेछ । सबैले आत्मसम्मानका साथ काम गर्ने वातावरण बनाउनु पर्छ,’ भट्टराईले भनेका छन्, ‘हामी वातावरण बनाउँछौं । जो जहाँ हुनुहुन्छ । पार्टीको जिम्मेवारी र विशाल परिवारमा फर्किन अनुरोध गर्छौं ।’ भदौ २३ र २४ गतेको प्रदर्शनपछि देश संक्रमणमा रहेको उनको भनाइ छ । जेनजीको माग अनुसार सरकार बनाउनमा एमाले तयार भए पनि संवैधानिक प्रक्रिया मिच्न खोजिनुले नराम्रो सन्देश गएको उनी बताउँछन् ।

‘जेनजीको माग अनुसार सरकार बनाउनमा हाम्रो विमति थिएन, छैन । यो प्रक्रियालाई र संविधान र संसद्कै बाटोबाट अगाडि जाउँ भन्ने थियो । अहिलेको प्रक्रियालाई संसद्ले निकास दिन सक्थ्यो । त्यतातर्फ जान खोजिएन र संसद् विघटन गरियो । यो राम्रो भएन । संविधान खारेज भए अर्को बनाउन सम्भव छैन । सानो प्रयत्नबाट बनेको संविधान होइन । संविधानलाई लिकमा फर्काउन हामीले प्रयत्न गर्नुपर्छ । शान्त र सौम्य ढंगले यो काम गर्नुपर्छ ।’ आफूहरू राजनीतिक निकासका निम्ति तयार रहेको तर भागबण्डाको पक्षमा नभएको पनि उनको भनाइ छ ।

‘राष्ट्रपति र प्रमलाई भन्न चाहन्छौं, संविधानको बाटोमा भए मान्छौं र संविधानलाई मिच्ने भए राष्ट्रिय एकतालाई बचाउन सक्दैनौं । हामी राजनीतिक निकासमा बाधक छैनौं,’ भट्टराईले भने, ‘राजनीतिक भागबण्डामा चासो छैन । हाम्रो चासो संविधान र लोकतान्त्रिक बाटो हो ।’ उनले सुशीला कार्कीलाई संसदले पनि प्रधानमन्त्रीको जिम्मेवारी दिन सक्ने आधार भ एपनि त्यसो नगरिएकोप्रति असहमति जनाएका छन् ।

उनले भने, सांसदभित्रबाटै विकल्प थियो तर त्यता जान खोजिएन । संसद् विघटन गरियो । यो सही निकास होइन । संविधानको सबैले पालना गर्नुपर्छ, संविधान खारेज भयो भने अर्को संविधान बनाउन सजिलो छैन । यो सानो प्रत्यत्नबाट बनेको होइन् । उनले स्थितिको सही मूल्यांकन गर्दै संविधान र लोकतन्त्रलाई सही ट्रयाकमा ल्याउने प्रयत्न गर्नुपर्ने बताए । उनले राष्ट्रपति र प्रधानमन्त्रीको हर कदम संविधानको बाटोबाट हुनुपर्ने बताए । २३ गते जेनजीको प्रदर्शनका क्रममा अरु पक्षले नकारात्मक फाइदा उठाएको उनी बताउँछन् । यसैले २३ गतेको घटनाको निष्पक्ष छानबिन गरी दोषीमाथि कारबाही गर्नुपर्ने उनको भनाइ छ । त्यस्तै, भदौ २४ गते थुप्रै सार्वजनिक सम्पत्तिमाथि तोडफोड भएको भन्दै निष्पक्ष छानबिन गरी दोषीलाई गर्न भट्टराईले माग गरेका छन् ।