काठमाडौं । नेकपा एमालेका उपाध्यक्ष रामबहादुर थापा ‘बादल’ ले जनताबाट निर्वाचित केपी ओली नेतृत्वको सरकार अपदस्थ गरेर अनागरिक सरकार गठन गरिएको टिप्पणी गरेका छन् । जेनजी प्रदर्शनकारीले आगजनी गरेको पार्टी कार्यालय अवलोकनपछि सञ्चारकर्मीहरूसँग कुरा गर्दै उनले सुशीला कार्की नेतृत्वको सरकारलाई ‘अनागरिक’ को संज्ञा दिएका छन् ।

नेता बादलले भने, ‘अहिले लोकतन्त्रलाई अपदस्थ गरिएको छ । नागरिक सर्वोच्चताको प्रतीक संसद् हो । तर संसद्लाई विघटन गरिएको छ । नागरिकहरूले निर्वाचित गरेको सरकारलाई अपदस्थ गरेको छ । संसद् विघटन गरिएको छ, अनागरिक सरकार असंवैधानिक ढंगले गठन गरिएको छ ।’ उनले पार्टी अब समीक्षा र ध्रुवीकरणको चरणमा रहेको जानकारी दिएका छन् । सुशीला कार्कीको नेतृत्वमा अन्तरिम सरकार गठन भएसँग अहिले ठूला राजनीतिक दलका नेताहरु विस्तारै राजनीतिक गतिविधिमा सक्रिय हुन थालेका छन् ।