काठमाडौं । नेकपा एमालेका महासचिव शंकर पोखरेलले कुनै पनि आन्दोलन, पार्टी वा नेतृत्वको भविष्य मुख्यतः स्पष्ट एजेण्डामा निर्भर रहने बताएका छन् । जेनजी आन्दोलनपछि एमालेमा नेतृत्व परिवर्तनको बहस चलिरहेको बेलामा महासचिव पोखरेलले यस्तो बताएका हुन् ।

‘कुनै पनि आन्दोलन, पार्टी वा नेतृत्वको भविष्य मुख्यतः स्पष्ट एजेण्डामा निर्भर रहन्छ’, उनले भनेका छन्, ‘विगतमा असोज १८ मा आलोचित र अस्वीकार्य देखिएको नेतृत्व माघ १९ पछि थप सान्दर्भिक बन्यो । किनभने असोज १८ ताका राजनीतिक दलहरू एजेण्डामा विभाजित र अन्योलग्रस्त थिए । तर माघ १९ पछि उनीहरूले आफ्ना एजेण्डा स्पष्ट पार्दै एकताबद्ध भए ।’

राजनीतिक दलहरू एजेण्डामा एकताबद्ध भएको परिणामस्वरूप जनता सार्वभौम बनेको र मुलुक संघीय लोकतान्त्रिक गणतन्त्रको युगमा प्रवेश गरेको स्मरण गरेका छन् ।