काठमाडौं । नेकपा एमालेका नेता महेश बस्नेतले केपी ओलीलाई प्रधानमन्त्रीबाट हटाउनकै लागि मात्रै देशमा ध्वंस मच्याइएको दाबी गरेका छन् ।

भक्तपुरको गुन्डुमा आयोजित युवा संघको कार्यक्रमस्थलमा सञ्चारकर्मीहरूसँग कुरा गर्दै उनले ओलीले प्रधानमन्त्रीबाट राजीनामा दिएपछि देश ध्वस्त बनाइएको टिप्पणी गरे । उनले भने, ‘भ्रष्टाचारविरुद्ध भनेर जेनजी भाइबहिनीहरूलाई उचालियो । तर त्यहाँ ठुलो अन्तर्राष्ट्रिय चलखेल र खुपिया एजेन्सीहरूको समेत लगानी भएको कुरा भएको छ । केपी ओलीले राजीनामा नदिँदासम्म देश जोगिएको थियो । उहाँले राजीनामा दिएपछि देश ध्वस्त पारियो ।’

उनले २३ गते २१ जनाको हत्या भएको विषयमा निष्पक्ष छानबिन हुनुपर्ने र भोलिपल्ट ५४ जनाको हत्या भएको विषयमा पनि बेग्लै छानबिन हुनुपर्ने बताए । उनले आजको शान्तिपूर्ण र सामान्य भेटघाट मात्र आयोजना गरिएको जानकारी दिएका छन् । उनले भने, ‘अहिलेको मन्त्रीहरूले आफूलाई सेलिब्रेटी भनेर घोषणा गर्दै हिँडेका छन् । त्यो खालको देखिँदैन । जनता केही दिनमै पछुताउने छन् ।’