काठमाडौं । नेकपा एमालेका अध्यक्ष केपी ओलीले सचिवालय बैठक बोलाएका छन् । भोलि गुन्डुस्थित आफ्नै निवासमा बस्ने गरी बैठक बोलाएको उपाध्यक्ष युवराज ज्ञवालीले जानकारी दिए ।

उनका अनुसार बैठक आइतबार दिउँसो १ बजे बस्नेछ । बैठकमा जेनजी आन्दोलपछि विकसित राजनीतिक घटनाक्रमबारे छलफल हुने जनाइएको छ । जेनजी आन्दोलनपछि एमालेभित्र अध्यक्ष केपी ओलीले नेतृत्व छाड्नु पर्ने आवाज पार्टीभित्रबाटै उठ्न थालेको छ । भोलिको बैठकले पार्टीको आगामी रणनीति तय गर्ने जनाइएको छ ।

अध्यक्ष तथा पूर्व प्रधानमन्त्री ओली भेटघाट कार्यक्रममा उपस्थित भएका छन् । बडादसैँका अवसरमा आज (शनिबार) भक्तपुरमा राष्ट्रिय युवा संघले आयोजना गरेको खुला भेटघाट कार्यक्रममा उनी सहभागी भएका हुन् । त्यसक्रममा बाक्लो रूपमा प्रहरी परिचालन गरिएको थियो । ओलीको सम्बोधनपछि कार्यक्रम सकिएको थियो ।