काठमाडौं । राष्ट्रिय सभाको विधायन समितिमा बिहीबार गृहमन्त्री ओमप्रकाश अर्यालले राजावादी अभियन्ता दुर्गा प्रसाईले सार्वजनिक गरेको विवादास्पद भिडिओमा सुन्निएको एक आवाज आफूकै भएको खुलासा गरेका छन् । सांसदहरूले उठाएका प्रश्नको जवाफ दिँदै उनले भिडियोमा आफ्नो आवाज भए पनि त्यसमा कुनै अमानवीय आशय नरहेको स्पष्टीकरण दिएका छन् ।

गृहमन्त्री अर्यालले भदौ २४ गतेको घटनासँग सम्बन्धित भिडिओबारे बोल्दै भने, ‘उक्त भिडिओमा बोलेकामध्ये एक म पनि हुँ । तर मैले बोलेको कुरामा कुनै गलत आशय छैन । आगजनी ठीक छ भनेर मैले कहीँ पनि भनेको छैन, बरु त्यस्तो हुन नहुने बताएको हुँ ।’ उनले उक्त ठाउँमा आफ्नो उपस्थिति शान्ति कायम गर्न र घटना नियन्त्रणतर्फ ध्यान दिलाउन मात्र भएको दाबी गरे ।

अर्यालका अनुसार भीडको हिंसात्मक गतिविधि थामिन सक्ने आशाले विभिन्न व्यक्तिहरूलाई आग्रह गरिए पनि कोही उपलब्ध नहुँदा आफूले नै संवादको जिम्मा लिएको बताए । ‘म अहिंसाकै पक्षधर हुँ । त्यसैका लागि त्यहाँ गएको थिएँ’, उनले थपे ।

दुर्गा प्रसाईले सार्वजनिक गरेको भिडिओमा के छ ?
मंसिर १ गते प्रसाईले झण्डै २७ मिनेटको एक सामग्री सार्वजनिक गरेका थिए, जसमा भदौ २३ र २४ का जेन–जी आन्दोलनका दृश्य, आगजनी, सुरक्षा अवस्था तथा त्यसपछिको राजनीतिक परिस्थिति प्रस्तुत गरिएको छ ।

उक्त भिडिओमा तत्कालीन प्रधानमन्त्री सुशीला कार्की र गृहमन्त्री अर्यालको भूमिकामाथि समेत प्रश्न उठाइएको छ । प्रसाईले उनीहरूलाई नेपालमा ‘विध्वंस भड्काउन विदेशी डिजाइनअनुसार काम गरेको’ जस्ता गम्भीर आरोप समेत लगाएका छन्—यस्ता दाबीहरू प्रसाईकै तर्फबाट प्रस्तुत गरिएको सामग्रीमा आधारित छन् ।

भिडिओको झण्डै १० मिनेटपछि देखिने एक फुटेजमा आकाशमा हेलिकप्टर उडिरहेको, आसपास घरमा आगलागी भएको दृश्य देखिन्छ र पृष्ठभूमिमा विभिन्न व्यक्तिहरूबीच भएको संवादकै अडियो समावेश गरिएको छ । सोही अडियोका केही भाग संसद् बैठकमा चर्चा र विवादको विषय बनेका हुन् ।

सार्वजनिक एक फुटेजको ब्याक ग्राउन्डमा हालकी प्रधानमन्त्री कार्की र गृहमन्त्री अर्यालको आवाज सुनिन्छ । उक्त दृश्यमा आकाशमा हेलिकप्टर उडिरहेको देखिन्छ । सँगै घर जलेर निस्किएको धुवाँको मुस्लै मुस्लो देखिन्छ ।
त्यही बेला अर्याल भन्छन्–यी घरमा मान्छे नि परे होलान् कोही न कोही ? क्याजुअल्टी (हताहती) पनि छ होला ?
त्यही बेला अर्को आवाज सुनिन्छ–उ हेलिकप्टर भागेछ ।
अर्को आवाज–उ अर्को अर्को….. हान्नु न ढुङ्गाले !
भाग्यो.. भाग्यो ।
अर्को आवाज–यिनीहरूलाई बचाउन के जरुरी थियो र ?
त्यसै क्रममा अर्याल सुनिन्छन्–हैन ठिक छ, मान्छे त बचुन् ।
त्यसपछि अहिलेकी प्रधानमन्त्री कार्की सुनिन्छन्–के बचाउनू ?! .. के (बचाउने) सेना हो ?
अर्याल भन्छन्–सेनाले भगाइ दियो !
कार्की भन्छिन्–सेनाले भगाए जस्तै भयो नि !
यसैगरी उक्त भिडिओमा संवेदनशील र अमानवीय आशयका कुराकानी भएका सुनिन्छन् ।

यस्तो छ गृहमन्त्री अर्यालको तर्क
सांसदहरूले उठाएको प्रश्नको उत्तर दिँदै अर्यालले आफूले भनेका भनाइहरूलाई केही व्यक्तिले तोडमोड गरेर प्रस्तुत गरिएको उल्लेख गर्दै भने, ‘म मान्छे बचुन भनेरै बोलेको हुँ । संवेदनशील अवस्थालाई नियन्त्रण गर्न प्रयास थियो, गलत आशय एक प्रतिशत पनि थिएन ।’
उनीसँगै भिडिओमा सुन्निएको अर्को आवाज तत्कालीन प्रधानमन्त्री कार्कीको भएको दाबी प्रसाईले गरेका छन्, तर त्यसबारे कार्कीको आधिकारिक प्रतिक्रिया सार्वजनिक भएको छैन ।

प्रसाईको दाबीअनुसार सो फुटेज बानेश्वर हाइटस्थित एक विदेशी संस्थाको कार्यालयबाट खिचिएको हो । यो दाबी पुष्टि भएको छैन, तर भिडिओ सार्वजनिक भएपछि राष्ट्रिय सभादेखि सामाजिक सञ्जालसम्म यसले ठूलो बहस जन्माएको छ । गृहमन्त्री अर्यालले भने संसद् बैठकमै आफूले बोलेको आवाज पहिचान भए पनि त्यसलाई गलत उद्देश्यको रूपमा प्रस्तुत गरिएको बताउँदै आफू अहिंसा र शान्तिपूर्ण समाधानको पक्षमै रहेको पुनः दोहोर्‍याए ।