काठमाडौं । नेकपा एमालेका महासचिव शङ्कर पोखरेलले मधेशमा कांग्रेस र एमालेका मुख्यमन्त्री हुनै सक्दैनन् भन्ने धारणा तोडिएको बताएका छन् । सामाजिक सञ्जाल फेसबुकमार्फत सरोज यादव र श्रीकृष्ण यादवले त्यो धारणा तोडेको पोखरेलले बताएका हुन् । नेपाली राजनीतिमा देखिएको यो परिवर्तन सकारात्मक र स्वागतयोग्य रहेको उनको भनाइ छ ।

‘मधेस प्रदेशमा कांग्रेस र एमालेका नेता मुख्यमन्त्री हुनै सक्दैनन् भन्ने धारणा एमाले नेता सरोज यादवले जोखिम मोलेर तोडे। त्यसपछि अहिले नेपाली कांग्रेसका नेता श्रीकृष्ण यादव मधेसवादी दलको समर्थनमा मुख्यमन्त्री बन्न सफल भए’ उनले लेखेका छन्, ‘नेपाली राजनीतिमा देखिएको यो परिवर्तन निश्चय नै सकारात्मक र स्वागतयोग्य छ । मधेसी जनताको जनादेश अनुरूपको नेतृत्व स्थापित हुनु लोकतान्त्रिक परिपक्वताको संकेत हो ।’