काठमाडौं । नेकपा एमालेका पोलिटब्युरो सदस्य महेश बस्नेतले झापामा कसैले पनि अध्यक्ष केपी शर्मा ओलीलाई हराउन नसक्ने दाबी गरेका छन् । आज (शनिबार) फेसबुकमार्फत अभिव्यक्ति सार्वजनिक गर्दै नेता बस्नेतले यस्तो दाबी गरेका हुन् ।

‘अहिले केपी ओली ज्यूलाई आउँदो चुनावमा हराउने भनेर केही तत्व लागिपरेका देखिन्छन्,’ बस्नेतले लेखेका छन्, ‘तर उनीहरूको प्रयास माखो मार्नेवाला छैन् । यो सबै मनको लड्डु घिउसँग खानु जस्तै कुरा हो !’ २०७९ को प्रतिनिधिसभा निर्वाचनमा झापा–५को अन्तिम मत परिणाम उल्लेख गर्दै उनले ओलीले उक्त निर्वाचनमा ऐतिहासिक मतान्तरसहित विजयी भएको तथ्य नै पर्याप्त रहेको दाबी गरे ।

‘उहाँले ५२ हजार ३१९ मत प्राप्त गर्दै नेपाली कांग्रेसका उम्मेदवार खगेन्द्र अधिकारीलाई हराउनु भएको थियो । अधिकारीले २३ हजार ७४३ मत मात्र पाएका थिए,’ उनले अगाडि लेखेका छन् । यो परिणाम कुनै संयोग मात्रै नभएको बस्नेत ठहर छ । उनले अगाडि भनेका छन्, ‘यो झापाका जनताले विकास, स्थिरता र राष्ट्र निर्माणप्रतिको ओलीप्रतिको गहिरो विश्वासको प्रष्ट प्रमाण हो ।’