काठमाडौं । नेकपा एमालेका महासचिव शंकर पोखरेलले पार्टीभित्र प्रतिष्पर्धाभन्दा एकता जरुरी रहेको बताएका छन् । उनले ११औं महाधिवेशनपछि एमाले अझ सुदृढ र एकताबद्ध भएर अघि बढ्ने दाबी गरे ।

पार्टीको ‘नवयुग ई–बुलेटिन’ सार्वजनिक गर्ने कार्यक्रममा बोल्दै पोखरेलले मंसिर २७ गते भक्तपुरको सल्लाघारीमा हुने उद्घाटन समारोहलाई महाधिवेशनको उत्सव मात्र नभई प्रतिगमनविरुद्धको जनपरिचालनको रूपमा प्रस्तुत गर्ने तयारी गरिएको बताए । उनले सो कार्यक्रममा सहभागी हुन सम्पूर्ण कार्यकर्तालाई अपिल पनि गरे।

उनका अनुसार एमाले मात्रै देशको विकासका लागि आवश्यक योजना बनाउन सक्षम शक्ति हो । पार्टी अध्यक्ष केपी शर्मा ओलीमाथि भइरहेको चौतर्फी प्रहार कुनै व्यक्तिगत विषय नभई एमालेको नीति, विचारधारा र नेपालको राष्ट्रिय हितविरुद्धको आक्रमण भएको उनको तर्क थियो ।

महासचिव पोखरेलले राष्ट्रिय राजनीति आज पनि एमाले र अध्यक्ष ओलीकै वरिपरि केन्द्रित रहेको उल्लेख गर्दै आउँदो महाधिवेशनले ओलीलाई पुनः अध्यक्ष चयन गर्ने विश्वास व्यक्त गरे । अध्यक्षमा प्रतिष्पर्धाको तयारी गरिरहेको भनिएको समूहलाई उदगृत गर्दै उनले अहिलेको आवश्यकता प्रतिष्पर्धा नभई एकता भएको स्पष्ट पारे । पोखरेलले पार्टीभित्र सबैलाई ओलीको नेतृत्वमा एकताबद्ध भएर अघि बढ्न आग्रह गरेका छन् ।