विराटनगर । नेकपा एमालेको धनकुटा र ओखलढुङ्गामा देखिएको महाधिवेशन प्रतिनिधि चयनसम्बन्धी विवाद अन्ततः नेतृत्वको सक्रियतामा समाधान भएको छ । दुवै जिल्लामा एकपक्षीय प्रक्रिया, असन्तुष्टि र बहिष्कारका कारण उत्पन्न विवादलाई संगठन विभाग र प्रदेश नेतृत्वले समन्वय गरी सहमतिमै प्रतिनिधि छनोट गरेको घोषणा गरिएको हो ।

धनकुटामा केही बुथमा तोडफोड र मतपत्र च्याताच्यात समेत भएपछि विवाद चुलिएको थियो । राजेन्द्र राई र इन्द्रमणि पराजुली समूहबीच प्रतिष्पर्धा देखिए पनि संगठन विभागको निर्देशनपछि कोशी प्रदेश इन्चार्ज शेरधन राई र केन्दीय सदस्य राजेन्द्र राईको सहमतिमूलक पहल सफल बनेको हो । सोही अनुसार धनकुटाबाट खुल्लातर्फ निरेन तामाङ, मनोज राई, शिव आङ्ला, निरन राई, चिन्तन तामाङ, परशु नेपाल र खगेन्द्र राई सर्वसम्मत प्रतिनिधि छनोट भएका छन् ।

त्यसैगरी युवा, दलित र महिला तर्फबाट क्रमशः सरोज राई, नैन रुचाल, तुलसी राई, सम्झना आले मगर, निर्मला इभाङ लिम्बू र गोमा कार्की चयन भएका छन् । साथै जिल्लाका दुई वरिष्ठ नेतालाई मनोनीत गर्ने सहमति पनि भएको छ । यसअघि प्रतिनिधि बनेका शान्तिराम गौतम र अर्जुन छाराहाङको स्थानमा यसपटक निरेन तामाङ र मनोज राई समावेश गरिएका छन् ।

यस्तै ओखलढुङ्गामा पनि एकपक्षीय घोषणा र पदाधिकारीबीचको मतभेदका कारण विवाद उत्पन्न भएपछि संगठन विभागले प्रक्रिया बदर गरी पाँच दिनभित्र सहमतिबाट वा पालिकास्तरमा चुनावमार्फत प्रतिनिधि चयन गर्न कार्यदल तोकेको थियो । कोशी प्रदेश इन्चार्ज शेरधन राई, संगठन विभाग सदस्य विशाल भट्टराई, जिल्ला इन्चार्ज यज्ञराज सुनुवार र किशोर अधिकारी सम्मिलित कार्यदलको निरन्तर छलफलपछि प्रतिनिधि छनोट सर्वसम्मत बनेको छ ।

बहिष्कार गरेको पक्षलाई चार प्रतिनिधि समावेश गर्दै कुल १२ जनाको सूची अन्तिम गरिएको छ । सहमतिअनुसार पूर्व जिल्ला अध्यक्ष मोहनकुमार श्रेष्ठ, जिल्ला उपसचिव तथा लिखु गाउँपालिका उपाध्यक्ष अस्मिता थापा, संविधानसभा सदस्य हर्कबोल राई र सकुन्तला राजभण्डारी प्रतिनिधिमा परेका छन् । साथै जीबी खड्का, अम्बिरबाबु गुरुङ, कमल न्यौपाने, इच्छाकुमारी गुरुङ, राजीव कटुवाल, रमिला मगर श्रेष्ठ, टीका धमला र ज्यानु कालिकोटे यसअघि नै प्रस्तावित सूचीबाट कायम गरिएको छ । दुवै जिल्लामा उत्पन्न विवाद समाधान भएसँगै महाधिवेशन प्रतिनिधिहरू सर्वसम्मत रूपमा टुंगिएको नेतृत्वले जनाएको छ ।