काठमाडौं । चर्चित लोकगायिका ज्योति मगर नेकपा एमालेको ११औं महाधिवेशनमा सक्रिय रूपमा देखिएकी छन् । मंगलबार बिहान काठमाडौंको भृकुटीमण्डपमा आयोजित महाधिवेशनस्थल पुगेर उनले केन्द्रीय सदस्यका उम्मेदवारहरूका पक्षमा मत माग्दै प्रचार–प्रसारमा सहभागिता जनाएकी हुन् । महाधिवेशन प्रतिनिधिहरूको भीडबीच मगरले उम्मेदवारका तस्वीर हातमा समातेर मतको अपिल गरिन् । विशेषगरी केन्द्रीय सदस्य पदका उम्मेदवार पूर्णबहादुर गुरुङ र किरण गुरुङको समर्थनमा उनी खुलेर उभिइन् । प्रचारका क्रममा उनी उम्मेदवार समर्थक जुलुसमा समेत सहभागी भइन्, जहाँ ‘आयो एमाले आयो’ जस्ता नारासँगै माहोल निकै उत्साहपूर्ण बनेको थियो ।

जनजाति समुदायका उम्मेदवारहरूको समर्थनमा निकालिएको झाँकीमा पनि ज्योति मगर सक्रिय रूपमा देखिइन् । जुलुसमा सहभागीहरू ‘आयो एमाले आयो, पूर्ण गुरुङ आयो’ भन्दै नाराबाजी गरिरहेका थिए भने ज्योति मगर नाच्दै र गीतको लयमा नारालाई साथ दिइरहेकी थिइन् । उनको उपस्थितिले महाधिवेशनस्थलको वातावरण अझ रंगीन र आकर्षक बनेको सहभागीहरूको भनाइ थियो । सञ्चारकर्मीसँगको छोटो कुराकानीमा ज्योति मगरले महाधिवेशनको माहोल निकै रमाइलो र ऊर्जावान् लागेको बताइन् ।

आफू उम्मेदवार नभए पनि युवा नेताको रूपमा पूर्ण गुरुङलाई समर्थन गरेको उनले स्पष्ट पारिन् । समावेशिता र पुस्तान्तरणको आवश्यकता औंल्याउँदै उनले युवाले नेतृत्वमा आउनुपर्ने समय आएको धारणा राखिन् । यद्यपि, ज्योति मगर औपचारिक रूपमा एमाले पार्टीमा प्रवेश गरेकी छैनन् । तर पछिल्लो समय उनका सार्वजनिक अभिव्यक्ति र अन्तर्वार्तामा एमाले तथा पार्टी अध्यक्ष केपी शर्मा ओलीप्रति सकारात्मक धारणा व्यक्त हुँदै आएको देखिन्छ । महाधिवेशनस्थलमा उनको उपस्थितिलाई कतिपयले सांस्कृतिक र राजनीतिक सक्रियताको मिश्रणका रूपमा पनि हेरेका छन् ।
कलाक्षेत्रकी चर्चित व्यक्तित्वको रूपमा परिचित ज्योति मगरको यस किसिमको सहभागिताले एमाले महाधिवेशनमा चर्चा पाएको छ भने राजनीतिक कार्यक्रमहरूमा कलाकारको भूमिकाबारे समेत नयाँ बहस सुरु गराएको छ ।