काठमाडौं । नेकपा एमालेको एघारौँ महाधिवेशनअन्तर्गत नयाँ नेतृत्व चयनका लागि हुने भनिएको मतदान पटक–पटक सर्दै जाँदा अझै सुरु हुन सकेको छैन । सुरुमा मंगलबार दिउँसो १२ बजे, त्यसपछि ३ बजे र पुनः ४–५ बजेदेखि मतदान हुने भनिए पनि साँझसम्म पनि प्रक्रिया अघि बढ्न सकेको छैन । केन्द्रीय निर्वाचन आयोगका अनुसार उम्मेदवारको नाम, फोटो र विद्युतीय भोटिङ मेशिन (ईभीएम) को कोडिङमा समस्या देखिएपछि मतदान ढिलाइ भएको हो । आयोगका सचिव कुन्साङ लामाले प्राविधिक कठिनाइका कारण निर्धारित समयमा मतदान सुरु गर्न नसकिएको स्वीकार गर्दै ‘४ वा ५ बजेपछि जसरी पनि प्रक्रिया थाल्ने प्रयास भइरहेको’ जानकारी दिएका छन् ।

तर प्राविधिक पक्षमा संलग्न लक्ष्मण रिमालले भने नाम तलमाथि परेको, फोटो कोडिङ पुनः गर्नुपरेको जस्ता समस्याले काम लम्बिएको जानकारी दिए । उनका अनुसार सबै प्रक्रिया मिलाउन समय लागेकाले ‘राति ८ बजेदेखि मात्र मतदान सुरु हुन सक्ने’ सम्भावना छ । मतदानका लागि ८० वटा विद्युतीय भोटिङ मेशिन प्रयोग गरिँदैछ र मतदान सकिन ६–७ घण्टा लाग्ने अनुमान गरिएको छ । निर्वाचन कार्यक्रम भृकुटीमण्डपमा हुँदैछ । मतदान ढिलाइसँगै आन्तरिक राजनीति पनि चर्किएको छ । अध्यक्ष पदका उम्मेदवार ईश्वर पोखरेल पक्षले तत्काल मतदान सुरु गर्न माग गर्दै निर्वाचन आयोगको ध्यानाकर्षण गराएको छ । सो समूहकी नेतृ अष्टलक्ष्मी शाक्यका अनुसार ढिलाइको नाममा ओली पक्षबाट चलखेल भइरहेको आशंका व्यक्त गर्दै प्रक्रिया अविलम्ब अघि बढाउन दबाब दिइएको हो ।

महाधिवेशनमा अध्यक्ष पदका लागि केपी शर्मा ओली र वरिष्ठ उपाध्यक्ष ईश्वर पोखरेलबीच कडा प्रतिष्पर्धा हुँदैछ । यसैगरी पाँच उपाध्यक्ष, एक महासचिव, तीन उपमहासचिव, ९ सचिव, ३३ स्थायी कमिटी सदस्य, ९९ पोलिटब्युरो सदस्य र ३०१ केन्द्रीय सदस्य चयनका लागि मतदान हुनेछ । केन्द्रीय सदस्यमा ११ जना तथा अनुशासन र लेखा आयोगका ६ जना पदाधिकारी भने यसअघि नै निर्विरोध निर्वाचित भइसकेका छन् । मतदानको समय झन् लम्बिँदै जाँदा महाधिवेशनस्थलमा उपस्थित प्रतिनिधिहरूमा अन्योल र चासो बढ्दै गएको छ । अब निर्वाचन आयोगले कहिले औपचारिक रूपमा मतदान सुरु गर्छ भन्ने प्रश्न सबैको ध्यानको केन्द्रमा छ ।