काठमाडौं । नेकपा एमालेको महाधिवेशनमा नयाँ नेतृत्व चयनका लागि भइरहेको मतदान अपेक्षाकृत निकै सुस्त गतिमा अघि बढिरहेको छ । लामो मतपत्र, धेरै उम्मेदवार र प्यानलको सूची हेर्दै मतदान गर्नुपर्ने बाध्यताका कारण मतदान प्रक्रिया ‘कछुवा गति’ मा अगाडि बढिरहेको छ । बुधबार बिहान सवा ९ बजेबाट शुरू भएको मतदान साँझ ५ बजेसम्म आइपुग्दा जम्मा ८०२ प्रतिनिधिले मात्रै मत हालेका छन् । महाधिवेशनमा कुल २ हजार २ सय ६२÷६३ प्रतिनिधि रहेका छन् । मतदानको यही रफ्तार कायम रहेमा प्रक्रिया रातभरि मात्र होइन, भोलि बिहानसम्म पनि लम्बिन सक्ने निर्वाचन अधिकारीहरूले बताएका छन् ।

विद्युतीय भोटिङ मेसिन सञ्चालनमा संलग्न राम–लक्ष्मणमध्येका रामका अनुसार सुरुमा फोटो र नाम हेरेर मतदान गर्दा प्रक्रिया छिटो हुने अपेक्षा गरिएको थियो । तर, अध्यक्षसहित सबै पदमा उम्मेदवारहरूको संख्या धेरै हुनु, साथै केपी शर्मा ओली र ईश्वर पोखरेल पक्षधरले आ–आफ्नो प्यानल सूची बोकेर मतदान गर्न जाँदा मतदाताहरू अल्मलिन पुगेका छन् ।

उनका अनुसार प्यानल सूची नबोकी मतदान गर्न जानेले २०–३० मिनेटमै प्रक्रिया पूरा गरेका छन् भने सूची बोकेर जानेले डेढ घण्टासम्म समय खर्चिएका छन् । एमाले केन्द्रीय निर्वाचन आयोगका उपाध्यक्ष सानुराज पोखरेलले साँझ ५ बजेसम्म ८०२ मत खसेको पुष्टि गर्दै एक मतदाताले औसतमा ३५ मिनेट समय लिएको जानकारी दिए । उनका अनुसार छिटो मतदान गर्नेले ९ मिनेटमै सकाएका छन् भने ढिला गर्नेले २ घण्टासम्म समय लिएका उदाहरण पनि छन् ।

महाधिवेशनमा ६४२ जना उम्मेदवारबाट ३०१ केन्द्रीय सदस्य, १९ पदाधिकारी तथा अनुशासन र लेखा आयोगका पदाधिकारी चयन गर्नुपर्ने भएकाले मतपत्र निकै लामो बनेको छ । यही कारण मतदान प्रक्रिया जटिल बनेको आयोगका अधिकारीहरूको निष्कर्ष छ । एक निर्वाचन अधिकारीले भने, ‘यही गतिमा मतदान भयो भने अझै कम्तीमा १० घण्टा लाग्ने देखिन्छ । रातभरिमा टुंग्याउन पनि गाह्रो हुन सक्छ ।’ अध्यक्ष पदका लागि केपी शर्मा ओली र ईश्वर पोखरेलबीच कडा प्रतिष्पर्धा भइरहेको छ । मंसिर २८ गतेदेखि शुरू भएको एमाले महाधिवेशन नयाँ नेतृत्व चयनसँगै समापन गर्ने तयारी भए पनि मतदानको सुस्तताले तालिका प्रभावित हुने संकेत देखिएको छ ।