झापा । पूर्व प्रधानमन्त्री समेत रहेका नेकपा एमालेका अध्यक्ष केपी शर्मा ओलीले झापालाई केन्द्रमा राख्दै नयाँ राजनीतिक शक्तिमाथि कडा टिप्पणी गरेका छन् । झापाको युवा भेलालाई सम्बोधन गर्दै उनले रास्वपाका वरिष्ठ नेता बालेन शाहलाई लक्ष्य गर्दै राष्ट्रिय भिजनको अभाव रहेको आरोप लगाएका छन् । ओलीका अनुसार बालेन झापा–५ मा उम्मेदवार बन्ने बाहेक देशव्यापी जिम्मेवारी वहन गर्नसक्ने अवस्थामा छैनन् ।

ओलीले नयाँ अनुहार भन्दैमा जनताले आँखा चिम्लेर विश्वास नगर्ने स्पष्ट पारे । उनले भने, ‘बैंकले पनि धितो बिना नोट छाप्दैन, अनि यहाँ भोट हाल्दा न चिनिएको, न जिम्मेवारी बोकेको व्यक्तिलाई कसरी विश्वास गर्ने ? भोलि खोज्न परे कहाँ जाने ?’ झापासँग बालेनको प्रत्यक्ष सम्बन्ध नरहेको दाबी गर्दै उनले स्थानीय उत्तरदायित्व बिना उम्मेदवारी दिनु अर्थहीन हुने बताए ।

पूर्व प्रधानमन्त्री ओलीले विकासका उदाहरण दिँदै आफूले बालेनको घर अगाडिको बाटो समेत बनाइ दिएको दाबी गरे । साथै, महोत्तरीको मटियारीदेखि जनकपुरसम्मको बाटो र पुल निर्माणमा पनि आफ्नो भूमिका रहेको उल्लेख गरे । बालेनमाथि आरोप लगाउँदै उनले भने, ‘खोला किनारमा बसेका बस्ती भत्काउने, कवाडीलाई गरिखान नदिने जस्ता कुरा गरेर विकास हुँदैन ।’

यही क्रममा ओलीले आगामी निर्वाचनमा एमालेको अवस्था बलियो रहेको दाबी दोहो¥याए । उनले ७० प्रतिशत मतसहित एमाले विजयी हुने दाबी गर्दै कांग्रेस कमजोर अवस्थामा रहेको र पूर्व माओवादीका धेरै मतदाता पनि एमालेतर्फ आकर्षित भएको बताए । झापाको कमल गाउँपालिकामा कार्यकर्तासँगको भेटमा उनले विकास, रूपान्तरण र जनआधारका हिसाबले सिंगो क्षेत्र एमालेको पक्षमा एकजुट रहेको बताए ।

ओलीले पछिल्लो समय देखिएका आन्दोलन र गतिविधितर्फ संकेत गर्दै राजनीतिलाई अपराधीकरणबाट जोगाउनु पर्ने बेला आएको बताए । गत भदौमा भएको आन्दोलनमा राजनीतिकभन्दा बढी आपराधिक गतिविधि भएको उनको टिप्पणी थियो । ‘केही मृत्यु आन्दोलनका क्रममा भए, तर धेरैजसो आपराधिक क्रियाकलापकै कारण भए’, उनले भने ।

उनले देशमा अस्थिरता सिर्जना गर्ने प्रयास भइरहेको आरोप लगाउँदै बाह्य शक्तिको चलखेलबाट नेपाललाई जोगाउनुपर्ने बताए । ‘हामीले भनेको मान्नुपर्छ भनेर दबाब दिन खोज्ने पनि आउलान्, तर त्यस्तो दबाब स्वीकार हुँदैन’, ओलीको भनाइ थियो । कांग्रेस–एमाले मिल्न नदिने र देशमा विदेशी प्रभाव रोक्ने प्रयासकै कारण यस्ता गतिविधि बढेको उनको दाबी छ ।