काठमाडौं । जेनजी मुभमेन्ट नेपालले प्रधानमन्त्रीका प्रमुख सल्लाहकार कुमार बेनलाई तत्काल पक्राउ गरी उनीमाथि लागेका आरोपबारे निष्पक्ष छानबिन गर्न सरकारसँग माग गरेको छ ।

संगठनका प्रवक्ता विजय शाहले जारी गरेको प्रेस वक्तव्यमा बेनमाथि कल बाइपास तथा विदेशी जासुसी संयन्त्रसँग कथित अपारदर्शी सम्पर्कको गम्भीर आरोप उठेकाले त्यसबारे तत्काल अनुसन्धान गर्न माग गरिएको छ ।

गम्भीर आरोपमा प्रश्न उठेका व्यक्तिलाई प्रधानमन्त्रीको प्रमुख सल्लाहकारजस्तो संवेदनशील जिम्मेवारीमा राखिनु कानुनी शासन र राष्ट्रिय सुरक्षाका हिसाबले चिन्ताजनक विषय भएको संगठनको भनाइ छ । पद र पहुँचका आधारमा कसैलाई अनुसन्धानबाट उन्मुक्ति दिन नहुने जेनजी मुभमेन्टले जनाएको छ ।

वक्तव्यमा बेनलाई राज्यमन्त्रीस्तरको सुविधा दिइएको विषयमा समेत प्रश्न उठाइएको छ । उनको शैक्षिक योग्यता, नियुक्तिको आधार र जिम्मेवारीबारे सरकारले स्पष्ट जानकारी सार्वजनिक गर्नुपर्ने माग संगठनले गरेको छ ।

सत्तारूढ दलकै एक सांसदले सरकारको शक्ति–केन्द्रबारे दिएको अभिव्यक्ति तथा त्यसैबीच प्रधानमन्त्रीका प्रमुख सल्लाहकारमाथि विदेशी जासुसी संयन्त्रसँग कथित सम्पर्कको आरोप सार्वजनिक हुनु गम्भीर विषय भएको संगठनले जनाएको छ ।

प्रधानमन्त्रीले संसदमा राष्ट्रिय सार्वभौमिकता र सीमा अतिक्रमणका विषय उठाइरहेका बेला उनका प्रमुख सल्लाहकारमाथि छिमेकी मुलुकसँग सम्बन्धित कथित जासुसी संयन्त्रसँग सम्पर्क रहेको आरोप लाग्नुले सरकारमाथि समेत प्रश्न उठाउने अवस्था बनेको जेनजी मुभमेन्टको दाबी छ ।

संगठनले बेनलाई तत्काल सरकारी जिम्मेवारीबाट अलग गरी कल बाइपाससम्बन्धी आरोपमा आपराधिक अनुसन्धान अघि बढाउन माग गरेको छ । साथै विदेशी जासुसी संयन्त्रसँग भएको भनिएको भेटघाट र सम्पर्कबारे सुरक्षा तथा कानुनी निकायबाट गम्भीर छानबिन गर्न आग्रह गरिएको छ ।

अनुसन्धान प्रभावित हुनसक्ने अवस्था रोक्न उनलाई जिम्मेवारीबाट अलग गर्नुपर्ने र राष्ट्रिय सुरक्षा, सार्वभौमिकता वा संवेदनशील सरकारी सूचनामा बाह्य प्रभाव वा पहुँच प्रमाणित भए प्रचलित कानुनअनुसार कारबाही गर्नुपर्ने संगठनको माग छ ।

जेनजी मुभमेन्ट नेपालले आफ्नो वक्तव्य राष्ट्रिय सुरक्षा परिषद्, राष्ट्रपति कार्यालय शीतल निवास र नेपाली सेनाको मुख्यालय भद्रकालीलाई समेत बोधार्थ पठाएको जनाएको छ ।

संगठनले सत्ताको आडमा कसैलाई कानुनी अनुसन्धानबाट उन्मुक्ति दिन नहुने भन्दै आरोपमाथि निष्पक्ष छानबिन गरी सत्यतथ्य सार्वजनिक गर्न माग गरेको छ ।