काठमाडौं । पछिल्ला चार दिनदेखि भइरहेको अविरल वर्षाका कारण बाढी, पहिरो र सडक भासिने घटनाले देशका विभिन्न प्रमुख राजमार्ग तथा सडकखण्डमा यातायात प्रभावित भएको छ। नेपाल प्रहरीका अनुसार रसुवा, नुवाकोट, धादिङ, काभ्रेपलाञ्चोक, चितवन, मनाङ, बागलुङ, रोल्पा, कालिकोट, गुल्मी, म्याग्दी, मुस्ताङ, हुम्ला, नवलपरासी पूर्व, पाल्पा, ललितपुर, लमजुङ, तनहुँ र पर्वतलगायत जिल्लाका सडकमा यातायात अवरुद्ध भएको हो।

रसुवाको पासाङ ल्हामु राजमार्ग बाढीले त्रिशूली नदी किनारको अधिकांश भाग कटान गरेपछि पूर्ण रूपमा अवरुद्ध भएको छ। यद्यपि काठमाडौं-टोखा-छहरे-विदुर-नुवाकोट हुँदै दरबार-फलाँटे-चोकदे-लच्याङ-सरमथली-पाच्र्याङ-भोर्ले-जिरो किलोमिटर-कालिकास्थान-स्याउबारी-राम्चे-सोले-धुञ्चे हुँदै स्याफ्रुबेँसी पुग्ने एक लेनको कच्ची वैकल्पिक सडक प्रयोग गर्न सकिने प्रहरीले जनाएको छ।

नुवाकोटको टोखा-छहरे सडकखण्डमा राति १० बजेदेखि बिहान ५ बजेसम्म अत्यावश्यक सेवाबाहेक सार्वजनिक तथा निजी सवारीसाधन सञ्चालनमा रोक लगाइएको छ। अर्को सूचना जारी नभएसम्म उक्त व्यवस्था लागू रहनेछ।

पृथ्वीराजमार्गका विभिन्न स्थानमा पनि पहिरो खसेपछि यातायात प्रभावित भएको छ। कृष्णभीर क्षेत्रमा ठूलो ढुङ्गासहितको पहिरो खसेपछि सडक एकतर्फी सञ्चालनमा रहेको छ भने बेनिघाट रोराङ-१० को पानीधारामा पहिरोका कारण सडक पूर्ण रूपमा अवरुद्ध भएको प्रहरीले जनाएको छ।

चितवनको नारायणगढ-मुग्लिन सडकखण्डका विभिन्न स्थानमा पहिरो गएपछि अर्को सूचना नभएसम्म सबै प्रकारका सवारीसाधनको आवागमन बन्द गरिएको छ। बिपी राजमार्गअन्तर्गत काभ्रेपलाञ्चोकको रोशी गाउँपालिका-७ चारसयबेँसी र रोशी-८ गिम्दीबेँसीमा पहिरो गएपछि सडक अवरुद्ध छ। धुलिखेल नगरपालिका-८ पकुचामा पहिरो खसेपछि अरनिको राजमार्गसमेत अवरुद्ध भएको प्रहरीले जनाएको छ।

गण्डकी प्रदेशमा मनाङको बेँसीसहर-खाङसार सडकखण्डमा साँझ ६ बजेदेखि बिहान ६ बजेसम्म सवारीसाधन सञ्चालनमा रोक लगाइएको छ। मनाङकै चामे-बेँसीसहर सडकखण्ड पहिरोका कारण पूर्ण रूपमा अवरुद्ध भएको छ।

बागलुङको मध्यपहाडी लोकमार्ग र कालीगण्डकी करिडोर, रोल्पाको घोराही-थवाङ-रुकुम सहिदमार्ग तथा कालिकोटको कर्णाली राजमार्ग पनि पहिरो र लेदोका कारण अवरुद्ध भएका छन्। गुल्मीका रिडी-तम्घास मदनभण्डारी राजमार्ग, रुद्रबेँसी–वामीटक्सार सडक तथा कालीगण्डकी करिडोरका विभिन्न स्थानमा पहिरो र खोलाको बहाव बढेपछि यातायात सञ्चालन प्रभावित भएको छ।

त्यसैगरी म्याग्दीको बेनी-जोमसोम, मुस्ताङको जोमसोम-कोरला, हुम्लाको कर्णाली करिडोर, नवलपरासी पूर्वको कालीगण्डकी करिडोर, पाल्पाको सिद्धार्थ राजमार्ग र ललितपुरको कान्तिलोकपथमा पनि पहिरो तथा लेदोका कारण यातायात सञ्चालन हुन सकेको छैन।

लमजुङको बेँसीसहर-मनाङ सडक तथा मध्यपहाडी लोकमार्ग, तनहुँको पृथ्वीराजमार्ग र पर्वतको मालढुङ्गा-बेनी सडकखण्ड पनि पहिरोका कारण अवरुद्ध रहेको प्रहरीले जनाएको छ।

लगातारको वर्षाका कारण जोखिम बढेपछि देशका विभिन्न सडकखण्डमा रातिको आवागमन रोक्ने तथा कतिपय सडकमा पूर्ण रूपमा यातायात बन्द गर्ने निर्णय गरिएको छ। प्रहरीले जोखिमयुक्त सडकमा अनावश्यक यात्रा नगर्न तथा स्थानीय प्रशासन र सुरक्षा निकायले जारी गरेका सूचनाअनुसार मात्र यात्रा गर्न आग्रह गरेको छ।