काठमाडौं । नेपाली कांग्रेसका महामन्त्री पदका उम्मेदवार डा. सुनिलकुमार शर्माले पार्टीलाई नयाँ मार्गचित्रसहित अघि बढाउने प्रतिबद्धता जनाएका छन्। उनले महाधिवेशनमा छुटेका नेता–कार्यकर्तालाई समेट्दै कांग्रेस रुपान्तरण गर्ने बताए।

शर्माले आफू संघर्षबाट अघि बढेको र कांग्रेसको इतिहासमा पहिलोपटक सुकुमवासी परिवारबाट महामन्त्री बन्ने दाबी गरे। उनले नागरिकले उपचारका लागि काठमाडौं धाउनुपर्ने अवस्था अन्त्य गर्ने तथा देशभरका गरिब र विपन्न नागरिकसँग प्रत्यक्ष जोडिने योजना पनि सुनाए।

मोरङ–३ बाट २०७९ मा प्रतिनिधिसभा सदस्य निर्वाचित शर्मा चिकित्सक तथा समाजसेवीका रूपमा परिचित छन्। कांग्रेसको १५औँ महाधिवेशनमा उनी महामन्त्री पदका लागि प्रतिस्पर्धामा छन्।