इरान–इजरायल द्वन्द्व ‘आगामी केही घण्टाभित्र’ शान्तिमा फर्कने आशा व्यक्त गर्दै फ्रान्सका राष्ट्रपति इमानुएल म्याक्रोँले इरानसँगको आणविक वार्ता पुनः सुरु गर्न आह्वान गर्नुभएको छ ।

दुई देशबीच जारी द्वन्द्वको तेस्रो दिन आइतबार इजरायलले इरानमा रहेका सैन्य स्थल र इन्धन डिपोमा बम बारी गरेको छ ।

म्याक्रोँले ग्रीनल्याण्डको भ्रमणका क्रममा भन्नुभयो, “मलाई आशा छ, आणविक क्षमतामा कुनै वृद्धि हुनबाट रोक्न, इरानमा आणविक क्षमताको अधिग्रहण गर्न र यस क्षेत्रमा कुनै पनि अशान्ति रोक्न आगामी घण्टाहरूले शान्ति र छलफलको लागि बाटो ल्याउनेछ।”

फ्रान्सका राष्ट्रपतिले जारी द्वन्द्वका बावजुद इरानको आणविक कार्यक्रमबारे वार्ताका लागि आफ्नो आह्वान दोहो¥याउनुभएको छ ।

’हिजो (शनिबार) मैले इरानका राष्ट्रपतिसँग कुरा गर्न पाएँ र जतिसक्दो चाँडो हामीबीच छलफलका लागि आह्वान गरेँ । अमेरिकी राष्ट्रपति ट्रम्पसँगको कुराकानीमा पनि मैले यही कुरा व्यक्त गरेको छु,” म्याक्रोँले भन्नुभयो ।

“आइतबारदेखि मङ्गलबारसम्म क्यानडामा बैठक गरिरहेका जी–७ का नेताहरूसँग यस विषयमा पुनर्विचार गर्ने अवसर हामीले केही घण्टाभित्रै पाउनेछौं,” उहाँले थप्नुभयो ।

सन् २०१५ मा ट्रम्पले आफ्नो पहिलो कार्यकालमा त्यागेको सम्झौतालाई प्रतिस्थापन गर्ने गरी नयाँ आणविक सम्झौताको बाटो खोज्न अमेरिका र इरानबीच गत अप्रिलदेखि पाँच चरणको वार्ता भएको थियो ।

छैटौँ चरणको वार्ता आइतबारका लागि तय भए पनि आयोजक देश ओमानले शनिबार वार्ता रद्द भएको जनाएको छ ।