काठमाडौं । दैलेखको जलजलेमा १ अर्ब १२ करोड घनमिटर प्राकृतिक ग्यास रहेको पत्ता लागेको छ । चाइना जिओलोजिकल सर्भेको भौगर्भिक अध्ययन र चीनकै सीएनपीसी सीबु इन्जिनियरिङ कम्पनीले गरेको ड्रिलिङका आधारमा १ अर्ब १२ करोड घनमिटर प्राकृतिक ग्यास भएको पत्ता लागेको हो ।

यसको अन्तिम प्रतिवेदन भने आउन डिसेम्बरसम्म आउने खानी तथा भूगर्भ विभागले जनाएको छ । यसबाट नेपाललाई ५० वर्ष पुग्नेछ । अब परीक्षण उत्पादन गरेर त्यसको यकीन गर्ने भन्दै विभागले आवश्यक प्रक्रिया अघि बढाएको छ । त्यहाँ चीनको सरकारी निकायले २०८० वैशाख २८ गतेदेखि झण्डै डेढ वर्ष ड्रिलिङ गरेर त्यसको अध्ययन गरेको थियो ।

विभागका उपमहानिर्देशक दिनेशकुमार नापितले ४ हजार १३ मिटरसम्म ड्रिलिङ गरेर नमूना लिएर परीक्षणका लागि चीन पठाइएको जानकारी दिए । अब बाँकी प्रक्रियाका लागि दुबै देशका सरकारबीच थप सम्झौता भइ काम अघि बढ्ने उनले बताए ।