काठमाडौं । नेकपा माओवादी केन्द्रले निजामती विधेयक तत्काल पारित गर्न माग गरेको छ । बिहीबारको प्रतिनिधिसभा बैठकमा माओवादी केन्द्रका प्रमुख सचेतक हितराज पाण्डेले तत्काल विधेयक पारित गर्ने व्यवस्था गर्न सरकारसँग माग गरेका हुन् ।

उनले संसदी समितिबाट पारित भएर संसद पुगेको विधेयक कार्यसूचीमा प्रवेश गरेर पनि हटाइएको उनले आपत्ति जनाए । उनले सरकारले बोल्ने एउटा र व्यवहार अर्को देखाउने गरेको बताए । पाण्डेले संघीय निजामती, विद्यालय शिक्षा र नागरिकता विधेयक समयमै पारित होस् भनेर प्रमुख प्रतिपक्षी दलले बारम्बार दबाब दिइरहेको भएपनि सरकारकै अनिच्छाको कारण ती विधेयक अहिलेसम्म अड्किएको बताए ।

बैठकमा नेकपा एकीकृत समाजवादीका वरिष्ठ उपाध्यक्ष राजेन्द्र पाण्डेले निजामती विधेयक तत्काल ल्याउन सरकारसँग माग गरे । उनले दुई वर्षको ‘कुलिङ पिरियड’ हटाउन उच्च पदस्थका कर्मचारीले दबाब दिएपछि सरकारलाई खुट्टा नकमाउन आग्रह गरे ।

उनले भने, ‘कुलिङ पिरियड खारेज गराउनको लागि संयुक्त राजीनामा दिन्छौँ भनेर धम्की दिँदै विधेयक ल्याउन रोकावट भएको सुन्नमा आएको छ । सरकारले खुट्टा नकमाओस्, तुरुन्त ल्याओस् । २५ जना सचिवले राजीनामा दिन्छन् भने नयाँ सहसचिवले काम पाउँछन् । नयाँ व्यक्तिले जिम्मेवारी पाउँछन् ।’