काठमाडौं । सरकारले आगामी आर्थिक वर्षको बजेटमा राखिएको ‘टेक एण्ड पे’ पीपीए नीतिबारे गम्भीरतापूर्वक पुनर्विचार नगरेको भन्दै स्वतन्त्र ऊर्जा उत्पादकहरूको संस्था नेपाल (इप्पान) ले आन्दोलनका कार्यक्रमहरू सार्वजनिक गरेको छ  ।

ऊर्जा क्षेत्रमा निजी क्षेत्रको लगानी ८० प्रतिशतभन्दा बढी रहेको अवस्थामा टेक एण्ड पे प्रणालीका कारण अध्ययनरत १७ हजार मेगावाट क्षमताका ३५० भन्दा बढी आयोजना प्रभावित हुने भन्दै इप्पानले आन्दोलनको बाटो रोजेको हो ।

इप्पानका अनुसार यी आयोजनामा निजी क्षेत्रबाट झण्डै ६६ अर्ब रुपैयाँ लगानी भइसकेको छ । इप्पानद्वारा जारी विज्ञप्तिमा भनिएको छ, ‘सरकारको बजेट वक्तव्यमा रन अफ रिभर आयोजनाको पीपीए टेक एण्ड पे आधारमा मात्रै गरिने निर्णयले निजी लगानी डुब्ने खतरा उत्पन्न भएको छ । यस निर्णयले पूर्वसहमति, अध्ययन अनुमति प्राप्त आयोजना निर्माणमै जाने बाटो बन्द गर्नेसम्मको अवस्था सिर्जना भएको छ ।’

इप्पानले आन्दोलनको पहिलो चरण अन्तर्गत असार ६ गते प्रधानमन्त्री, ऊर्जा तथा अर्थमन्त्रीलाई पुनः ज्ञापनपत्र बुझाउने, असार ७ गते एसएमएस अभियानमार्फत टेक एण्ड पे फिर्ता लिन अनुरोध गर्ने, असार ८ गते सामाजिक सञ्जालमार्फत विरोध सन्देश लेख्ने, असार ९ गते विभिन्न निजी क्षेत्रका संघ संस्थासँग छलफल गरी संयुक्त धारणा सार्वजनिक गर्ने र असार १० गते प्रतिनिधिसभाका सभामुख तथा प्रमुख सचेतकलाई एसएमएस पठाउने कार्यक्रम तय गरेको छ ।