एक वर्ष अघि आफ्नो उत्पादनले उचित बजार नपाएको भन्दै सडकमै गोलभेडा फ्याँकेर सरकारको विरोध जनाएका चितवनका किसानले अहिले फेरी सडकमै दूध पोखेर आन्दोलन गरेका छन् ।

सरकारले समयमा दुधको भुक्तानी नदिएको आरोपमा उनीहरुले सडकमा नै दुध पोखेर आन्दोलन गरेका हुन् । चितवन दुग्ध उत्पादक सहकारीहरुले दुधको बिक्री तथा भुक्तानीमा देखिएको बेतिथिको बिरोधमा आन्दोलनमा उत्रिनु परेको चितवन दुग्ध उत्पादक सहकारी संघका अध्यक्ष किशोर बगालेले बताएका छन् । किसानहरुले सडकमा दूध पोखाउनुका साथै समस्या समाधानका लागि प्रमुखजल्ला अधिकारी भुपेन्द्र थापालाई ज्ञापन पत्र बुझाएका छन् । सरकारले आफुहरुको आन्दोलनलाई वेवास्ता गरी रकम भुक्तानीमा ढिलाई गरे अझ ससक्त रुपमा आन्दोलन गर्ने अध्यक्ष बगालको चेतावनी छ ।

किसानहरुले मुख्यगरी दुई वटा माग अघि सारेका छन् । आफुहरुले उत्पादन गरेको दुधको बजार सुनिश्चितता र किसानहरुले पाउनु पर्ने रकमको भुक्तानी पाउनुपर्ने उनीहरुको माग छ । साउन महिना देखिको करीब ५२ करोड भुक्तानी बाकी रहेको किसानले बताएका छन् । विगत ५ दिनदेखि दुधको बिक्रि ठप्प भएपछि किसान थप आक्रोसित बनेका हुन् । चितवनवाट मात्रै दैनिक १ लाख ५१ हजार लिटर दुध बिक्री हुदै आएको छ ।