काठमाडौं । आम जनता पार्टीको आईटी आर्मी वैदेशिक रोजगार विभागको घेराउ गरेको सोमबार नौ दिन पुगेको छ । वैदेशिक रोजगार पीडितलाई न्याय दिलाउन आईटी आर्मीले शुरू गरेको आन्दोलन सोमबार नवौ दिन पुगेको हो ।

आन्दोलनको नवौ दिन पूग्दा पनि सरकार कानमा तेल हालेर बसेकोमा आन्दोलनकारीहरु आक्रोशित बन्दै गएका छन् । विदेश जाने कामदारसँग अवैध ढंगले लिएको रकम फिर्ता गर्नुपर्ने, ठग मेनपावर र एजेन्टलाई कारवाही गर्नुपर्ने, वैदेशिक रोजगार पीडितहरूलाई न्याय दिनुपर्ने, विदेशमा अलपत्र परेकाहरुको उद्दार गर्नुपर्ने, असुरक्षित रोजगारीमा पठाउने अधिकारीलाई कारवाही गर्नुपर्ने जस्ता मागहरु सहित संघर्षलाई अगाडि बढाइरहेका छन् । उनीहरुले आफ्ना माग पूरा नगरे थप सशक्त आन्दोलन गर्ने चेतावनी दिएका छन् ।