काठमाडौं । नेकपा एमालेका नेता विष्णु रिजालले अन्तरिम सरकार कम्पास हराएको जहाज जस्तो दिशाहीन देखिएको टिप्पणी गरेका छन् । ‘संविधानमा व्यवस्था नभए पनि चुनाव गराउने एक मात्र कार्यादेशसहित एक महिनाअघि बनेको अन्तरिम सरकार यसबिचमा कम्पास हराएको जहाज जस्तो दिशाहीन देखिएको छ,’ उनले सामाजिक सञ्जालमा लेखेका छन्, ‘न राजनीतिक दलहरूसँग संवाद न शान्ति–सुव्यवस्थाको प्रत्याभूतिले सरकार केका लागि र किन बनाइएको रहेछ भन्ने थप रहस्य सिर्जना गरेको छ ।’

राजनीतिक दलका नेताहरूलाई आतङ्कित बनाउने, भागेका अपराधीलाई निर्बाध उन्मुक्ति दिने, प्रहरीका लुटिएका ९ सय हतियारको खोजी नगर्ने भन्दै उनले सरकारको आलोचना गरेका छन् । ‘सरकारी संरचना जलाउने अपराधीहरूलाई छुट दिने, नियुक्ति–सरुवा–बढुवा, विदेश भ्रमण आदिमा रमाउने जस्ता कामले नागरिकमा थप आशंका र अन्योल मात्र बढाएको छ,’ उनले लेखेका छन्, ‘राजनीतिक अपरिपक्वताबाट ग्रस्त पूर्वाग्रही सरकारले चुनाव गराउन सक्दैन भन्ने सन्देश दिएको छ ।’