काठमाडौं । बलिउड अभिनेत्री तथा भाजपा सांसद हेमा मालिनीले आफ्ना पति तथा अभिनेता धर्मेन्द्रबारे सञ्चारमाध्यमले गलत समाचार दिएको भन्दै आपत्ति जनाएकी छन् । केही भारतीय सञ्चारमाध्यमले उनी नरहेको दाबी गर्दै समाचार लेखेपछि हेमाले सामाजिक सञ्जालमा पोस्ट गर्दै खबर झुटो भएको भन्दै आपत्ति जनाएकी हुन् ।

उनले खण्डन गरेसँगै भारतीय सञ्चारमाध्यमले त्यो समाचार हटाएर उनको प्रतिक्रिया राखेका छन् । हेमा मालिनीले सामाजिक सञ्जालमा लेखेकी छन्, ‘जे भइरहेको छ त्यो अक्षम्य छ ! जिम्मेवार च्यानलहरूले उपचारको प्रभाव परिरहेको र निको भइरहेका व्यक्तिका विषयमा कसरी गलत समाचार फैलाउन सक्छन् ?’ उनले अगाडि लेखेकी छन्, ‘यो अत्यन्तै अनादरपूर्ण र गैरजिम्मेवारपूर्ण छ । कृपया परिवार र उनीहरूको गोपनीयताको सम्मान गर्नुहोस् ।’

बलिउड अभिनेता धमेन्द्रको मृत्यु भएको खबरलाई उनको परिवारले खण्डन गरेको हो । धमेन्द्रकी पत्नी हेमामालिनीले आफ्नो श्रीमानको स्वास्थ्य अवस्था सुधारोन्मुख रहेको दाबी गरेकी छन् । भारतीय रक्षामन्त्री राजनाथ सिंहलगायत थुप्रै हस्तिहरूले सामाजिक सञ्जालमा उनलाई श्रद्धाञ्जली दिएका छन् । तर, परिवारका सदस्यहरूले भने ठाडै अस्वीकार गरेका छन् ।