सुर्खेत । तीन दिनअघि मात्रै सुर्खेतको वीरेन्द्रनगरमा खोलिएको नेकपा एमालेकी नेतृ शान्ता चौधरीको अचार पसलमा आगजनी भएको छ । आज (आइतबार) बिहान करिब ३ बजेको समयमा चौधरीको पसलमा आगलागी भएको प्रहरीले जनाएको छ । शान्ता चौधरी आफै आएर तीन दिनअघि शुक्रबार सुर्खेतको वीरेन्द्रनगर–६ सुपरमार्केटमा अचार पसल सञ्चालन गरेकी थिइन् । पसलमा आगलागी भएपछि नेतृ चौधरीले आगजनीमा संलग्नलाई कारबाही गर्न माग गरेकी छन् ।

उनले आफ्नो जीन्दगीका हरेक प्रयासमा आगजनी भएको भन्दै सामाजिक सञ्जाल फेसबुकमा चौधरीले लेखेकी छन्, ‘जीन्दगीको हरेक प्रयासमा आगो नै लाग्छ मलाई । सुर्खेतको शान्ताको अचार आउटलेट्मा कुन अपराधीले आगो लाइदिएछ । नेपाल प्रहरीलाई तत्काल अपराधी पत्ता लगाई कारबाहीका लागि अनुरोध गर्दछु ।’

यस्तै शान्त चौधरीको पसलसँगै एमाले सुर्खेत जिल्ला कमिटी सदस्यको फेन्सी पसलमा पनि आगजनी भएको छ । यी आगलागीका घटना शंकास्पद हुन सक्ने नेतृ चौधरीले बताएकी छन् । तर, प्रहरीले आगो उद्योगबाटै लागेको अनुमान गरेको छ । आगजनीबाट ३० लाख बढीको धनमाल क्षति भएको अनुमान प्रहरीको छ ।