काठमाडौं । नेकपा एमालेका पोलिटब्युरो सदस्य महेश बस्नेतले सरकारको सुरक्षा व्यवस्थामाथि प्रश्न उठाएका छन् । महासचिव शंकर पोखरेलसहित पार्टीको कार्यक्रममा सहभागी हुन बाराको सिमरा जान लाग्दा जेनजी युवाहरु आन्दोलनमा उत्रिएका थिए । विमानस्थालसम्म तोडफोड गर्ने तहमा युवाहरु उत्रिएपछि स्थानीय प्रशासनले कर्फ्यु लगाएको छ । तर, सामान्य घटनालाई नियन्त्रण गर्न नसकेर कर्फ्यु लगाउनु नैतिकरूपमा गलत कार्य भएको उनले बताएका हुन् ।

उनले भनेका छन्, ‘राष्ट्रिय युवा संघ नेपालको मधेश जागरण सभामा बाराको सिमरा जान लाग्दा यएरपोर्ट अवरोध गरेर जान नदिने ‘जेन–जेड’ को नाममा विभिन्न दल–आवद्ध अराजक भिड उतारेर आन्दोलन गराउने र ५०–६० जना संलग्न त्यति सामान्य घटनालाई नियन्त्रण गर्न नसकेर कर्फ्यु लगाउनु नैतिकरूपमा गलत कार्य हो ।’

सभा–सम्मेलन गर्न पाउने, स्वतन्त्र विचार राख्न पाउने जस्ता संविधानले दिएको मौलिक अधिकारहरू हनन गरेर दलहरूको गतिविधि रोक्ने सरकारले फागुन २१ मा चुनाव गराउँछु भनेर दाबी गर्नु हास्यास्पद भएको उनको टिप्पणी छ । उनले भनेका छन्, ‘हे कठपुतली सरकार, लोकतन्त्र, बिधिको शासन र सुशासनको अझ कति खिल्ली उडाउने हो ? नियत स्पष्ट भइसकेको छ । जनता सबै बुझिसकेका छन् ।’ उनले अवरोधले विचलित नहुने भन्दै लोकतन्त्र, कानुनी शासन र सुशासनको पक्षमा हाम्रो संघर्ष निरन्तर जारी राख्ने बताएका छन् ।

पार्टीका शीर्ष नेता जेनजीको विरोध र कफ्र्युका कारण जान नसके राष्ट्रिय युवा संघको प्रदेश भेला परवानीपुरमा जारी छ । महासचिव शंकर पोखरेलले उद्घाटन गर्ने तय भएकोमा सिमरामा तनाव भएपछि सामान्य रूपमा कार्यक्रम गर्ने तयारी रहेको एमाले नेता किसान श्रेष्ठले जानकारी दिएका छन् । कर्फ्युका कारण जनप्रदर्शनको कार्यक्रम भने स्थगित भएको छ ।

सिमरा विमानस्थलमा जेनजी प्रदर्शनको विरोधका कारण जहाज नगएपछि एमालेका महासचिव शंकर पोखरेल, पोलिटव्युरो सदस्य महेश बस्नेतालगायतका नेताहरू काठमाडौंमै रोकिएका हुन् । जनप्रदर्शनका लागि विभिन्न स्थानबाट अगाडि बढेका एमाले कार्यकर्ता, समर्थक र शुभचिन्तक कर्फ्युका कारण बाटैमा रोकिएको नेता श्रेष्ठले जानकारी दिए । ‘पाँच हजार मान्छे बाटैमा छन्, उनीहरूलाई फर्किन भनिएको छ’, उनले सुनाए ।