काठमाडौं । नेकपा एमालेका नेता महेश बस्नेतले सरकारले आगामी ६ गते हुने एमालेको प्रदर्शन रोक्न खोजे त्यसको राजनीतिक परिणाम गम्भीर हुने चेतावनी दिएका छन् । काठमाडौंमा आयोजित पत्रकार सम्मेलनमा उनले भृकुटीमण्डपमा आयोजना हुने उपत्यकास्तरीय विशाल सभाले ‘सरकारको आधार नै हल्लिने’ दाबी गरे ।

बस्नेतले उक्त दिन अध्यक्ष केपी शर्मा ओलीको उपस्थितिमा ‘युथ भोलेन्टियर्स फोर्स’ औपचारिक रूपमा घोषणा गरिने बताए । उनले माइतीघरदेखि नयाँबानेश्वरसम्म जुलुससहितको प्रदर्शन हुने जानकारी दिंदै भने, ‘६ गतेको सभा सफल भएपछि प्रधानमन्त्री सुशीला आमैले राजीनामा दिनुपर्ने परिस्थिति उनले आफै महसुस गर्नेछिन् ।’

सरकारलाई ‘अवैधानिक र संविधानले नचिनेको’ भन्दै बस्नेतले सरकार प्रमुख सुशीला कार्की प्रदर्शन रोक्न सक्रिय रहेको आरोप लगाए । सिमरा भ्रमण रोकिएको प्रसंग जोड्दै उनले भने, ‘उनीहरू बारामा हामीलाई अड्याएर एउटा धक्का दिए । तर हामी रोकिँदैनौं । एमाले र युवा संगठन त दुबो जस्तै—जति दबाए पनि फेरि पलाउँछ ।’ आगामी प्रदर्शनका लागि व्यापक तयारी भइरहेको बताउँदै उनले काठमाडौंमा ‘अहिलेसम्मकै ठूलो सभा’ हुने दाबी गरेका छन् ।