काठमाडौं । नेकपा एमालेले आज पार्टीमा नीति र नेतृत्वको सुरक्षाका लागि भन्दै नेशनल भोलेन्टियर फोर्स घोषणा गर्दैछ । फोर्स घोषणाअघि एमाले निकट युवाहरूले  र्‍याली गरेका छन् । मधेश बस्नेत, युवा संघका अध्यक्ष क्षितिज थेबेलगायतले  र्‍यालीको नेतृत्व गरेका छन् । बबरमहलको कार्की व्यांक्वेटमा अध्यक्ष केपी शर्मा ओलीले फोर्सको घोषणा गर्ने कार्यक्रम छ । समाजमा बढेको असुरक्षा, अशान्ति र भदौ २३–२४ को घटनापछि आम मानिसको खस्किएको मनोबल उठाउन एनभीएफ घोषणा गर्न लागिएको एमालेले जनाएको छ ।

उनले खास जेनजीहरूका माग सम्बोधन एमाले नै गर्ने दाबी गर्दै जेनजी आन्दोलनका घाइते र शहीदहरूलाई न्याय दिन पनि प्रतिनिधिसभा पुनर्स्थापना गर्नुपर्ने बताए । मार्चपासमा सहभागी एमाले कार्यकर्ताहरूले रातो क्याप लगाएका छन् । उनीहरूले प्रधानमन्त्रीले राजीनामा दिन माग गर्दै नाराबाजी गरिरहेका छन् । उक्त मार्चपासलाई मध्यनजर गर्दै बाक्लो मात्रमा सुरक्षाकर्मीको उपस्थिति देखिन्छ । आजै एमाले अध्यक्ष केपी शर्मा ओलीले ‘नेशनल भोलेन्टियर फोर्स’को घोषणा गर्नेछन् । ओलीको विशेष सम्बोधनमा कार्की बैङ्क्वेटमा एमालेको रक्षापंक्ति मानिएको नेसनल भोलेन्टियर फोर्स घोषणा हुन लागेको हो ।

जेन–जी आन्दोलनपछि रक्षात्मक बनेको एमालेले उक्त फोर्सलाई विशेष प्राथमिकता दिएको छ । अध्यक्ष ओलीले यो शक्तिलाई आफ्नो रक्षा कवजको रुपमा लिएको भए पनि फोर्स बनाउन नहुने एमालेमा अर्काे समूह पनि रहेको छ । बिहीबार पार्टी कार्यालय च्यासलमा बसेको सचिवालय बैठकमा केही पदाधिकारीहरूले फोर्स घोषणा गर्ने कार्यक्रम तत्काल रोक्न भनेका थिए । तर, ओलीकै उपस्थितिमा आज फोर्स घोषणा हुन लागेको हो ।