काठमाडौं । नेकपा एमालेले आज (शनिबार) संघीय राजधानी काठमाडौँमा जनप्रदर्शनसहित जनसभा गर्दैछ । एमाले बागमती प्रदेश कमिटीको आयोजनामा प्रदर्शनीमार्गमा हुन लागेको यो कार्यक्रमलाई पार्टीले ‘शान्तिपूर्ण जनप्रदर्शन तथा जनसभा’ को नाम दिएको छ ।

यद्यपि, राजनीतिक वृत्तमा यसलाई एमालेको ‘शक्ति प्रदर्शन’ का रूपमा हेरिएको छ । पछिल्लो राजनीतिक घटनाक्रमप्रति आक्रामक बन्दै आएको एमाले आज सडकबाटै आफ्नो शक्ति देखाउने मुडमा देखिएको छ । खासगरी संसद् विघटन र सुशीला कार्कीको नेतृत्वमा बनेको सरकार असंवैधानिक भएको निष्कर्ष निकाल्दै त्यसको विरोधस्वरूप यो जनसभा आयोजना गरिएको नेताहरूले बताएका छन् ।

जनसभा भृकुटी मण्डपमा हुनेछ । एमालेका नेता–कार्यकर्ता, जनसंगठन, सम्पर्क समन्वय कमिटीका तर्फबाट निकालिने र्‍याली प्रदर्शनी मार्गमा जम्मा हुनेछ । प्रदर्शनी मार्गबाट रत्नपार्क परिक्रमा गरेर भृकुटी मण्डपमा आमसभामा परिणत हुने बताइएको छ । जनसभामा अध्यक्ष केपी शर्मा ओलीले सम्बोधन गर्नेछन् । प्रदर्शनलाई भव्य बनाउन एमालेले व्यापक तयारी गरेको छ । एमाले नेता महेश बस्नेतले आजको सभामा उपत्यका र आसपासका क्षेत्रबाट करिब ६० हजार मानिस उतार्ने दाबी गरेका छन् ।

प्रदर्शनलाई व्यवस्थित र अनुशासित बनाउन भन्दै पार्टीले यसअघि नै ‘नेशनल भोलेन्टियर फोर्स’ घोषणा गरिसकेको छ । प्रतिनिधि सभा विघटनविरुद्ध सडकदेखि अदालतसम्म उपस्थिति जनाउन खोजेको एमालेले आजको जनसभालाई एमालेले आन्तरिक शक्ति मजबुत भएको सन्देश दिने कार्यक्रमका रुपमा पनि लिएको छ । एमालेले संसद विघटन र सुशीला कार्की नेतृत्वको सरकार असंवैधानिक भन्दै आएको छ ।